ԵՐԵՎԱՆ, 13 մարտի — Sputnik. ՀՀ երկրորդ նախագահ Ռոբերտ Քոչարյանի կալանավորումը 2 ամսով երկարացնելու միջնորդության քննությունն հետաձգվեց։ Այն կկայանա վաղը`մարտին 14–ին, ժամը 10.00–ին։ Այս մասին այսօր, դատական նիստից հետո լրագրողներին ասաց Ռոբերտ Քոչարյանի պաշտպաններից Հայկ Ալումյանը։
Հայկ Ալումյանը տեղեկացրեց նաև, որ այսօրվա նիստին Քոչարյանը չի մասնակցել, քանի որ նպատակահարմար չի համարել։
Պատասխանելով ՀՀ 3–րդ նախագահ Սերժ Սարգսյանի «Մարտի 1–ի գործի» շրջանակներում տված ցուցմունքի մասին հարցին` Ալումյանն ասաց. «Սերժ Սարգսյանը Ռոբերտ Քոչարյանի դեմ ցուցմունք չի տվել։ Նա ցուցմունք է տվել գործի շրջանակում»,– ասաց փաստաբանը։
Հարցին՝ բացի Արշակ Կարապետյանից էլ ո՞ւմ ցուցմունքներն են դրված 2–րդ նախագահի մեղադրանքի հիմքում, Հայկ Ալումյանը պատասխանեց. «Արշակ Կարապետյանի ցուցմունքներն այնպիսին չէին, որոնց վրա կարելի լիներ կառուցել այս մեղադրանքը։ Սա պարզապես անհեթեթ մեղադրանք է։ Գնալով հասկանալի է դառնում, որ ուղղակի խնդիր է դրված ուժային ձևով հարցը լուծեն, այսինքն` գործն ուղարկեն դատարան և այնքան ճնշեն, որ դատարանը մեղադրական դատավճիռ կայացվի»,– ասաց Հայկ Ալումյանը։
Հիշեցնենք, որ Հատուկ քննչական ծառայությունը միջնորդել է ևս 2 ամսով երկարացնել 2–րդ նախագահ Ռոբերտ Քոչարյանի կալանավորման ժամկետը։
Հունվարի 18–ին առաջին ատյանի դատարանի որոշմամբ բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ:
Դատարանի հիշյալ որոշման դեմ պաշտպանական խումբը վերաքննիչ բողոք էր ներկայացրել, որը սակայն Վերաքննիչ դատարանի փետրվարի 7-ի որոշմամբ մերժվել էր: