ԵՐԵՎԱՆ, 11 մարտի — Sputnik. Հայաստանի Պետեկամուտների կոմիտեն 2018թ.–ի ընթացքում քրեական գործ է հարուցել 24 միլիարդ դրամ հարկերից խուսափելու համար։ Այդ մասին լրագրողներին հայտարարեց հանրապետության ՊԵԿ ղեկավարի տեղակալ Ռուստամ Բադասյանը։
Նա նշեց, որ խոսքը միայն ՊԵԿ–ում հարուցված քրեական գործերի մասին է։ Մի շարք այլ հարկային գործեր է հարուցել Ազգային անվտանգության ծառայությունը։ Հենց ԱԱԾ–ն է վարում խոշոր սուպերմարկետների դեմ աղմկահարույց գործերը, որտեղ տեղի են ունեցել ստուգումներ 2018թ.–ի մայիս–հունիսին։
Ինչ վերաբերում է Պետեկամուտների կոմիտեի քրեական գործերին, ապա 2018թ.–ին աճել են ստուգումների մասշտաբները։ Այսպես, 2016թ.–ին հարուցվել են 5,4 միլիարդ դրամի քրեական գործեր, 2017թ.–ին` 1,8 միլիարդ դրամի։ Իսկ 2018-ին` արդեն 134 քրգործ, որոնց նախնական հաշվարկներով պետությանը պատճառած վնասը մոտ 23,9 մլրդ դրամի է:
Այդ գումարներից որքա՞նն է վերադարձվել պետբյուջե. 2016թ.–ին դատական գործերի արդյունքում բյուջե է վերադարձվել 4,6 միլիարդ դրամ, 2017թ.–ին` 8,5, 2018թ.–ին` 8,5։ Այդ փոխհատուցումները վերաբերում են նաև նախորդ տարիների քրեական գործերին։
ՊԵԿ–ին ամենից շատ «զայրացրել» են ավտոմոբիլային գազալցակայանները. հենց այստեղ են հայտնաբերել 16,1 մլրդ դրամի խախտում։ Գազալցակայաններից մի քանիսը շարունակում են «խաղալ» գազի ջերմաստիճանի և ճնշման վրա. լիցքավորում են տաք գազ, որպեսզի մեկ խորանարդ մետրում ավելի քիչ գազ տեղավորվի։ Իսկ նոր նախագծի համաձայն` գազը վաճառելու են ոչ թե խմ–ով, այլ կիլոգրամով։ Սա պետք է բացառի նման կեղծիքները։
Եվս 2,2 միլիարդ դրամի խախտում գտել են մաքսային բրոքերների մոտ, որոնք չեն հայտարարագրել իրենց շրջանառությունը։
Մոտ 1,3 մլրդ դրամի խախտումներ կան շինարարական ընկերություններում։ Նրանցից շատերը իրենց բնակարանների վաճառքը հայտարարագրել են իջեցված գներով` ավելի քիչ հարկի վճարելու համար։
Վերջապես, մոտ 427 միլիոն դրամի խախտումներ են թույլ տվել ապահովագրական ընկերությունները։
Գազալցակայաններում ստուգումները հիմնականում կրել են ոչ պլանային բնույթ` կապված ահազանգերի հետ, որոնց հետքերով գնացել են ՊԵԿ օպերատիվ աշխատողները։ 2019թ.–ին կշարունակվեն ինչպես պլանային, այնպես էլ ոչ պլանային ստուգումները։