ԵՐԵՎԱՆ, 4 մարտի — Sputnik. Հայ բժիշկները վերադարձնում են մարդկանց լսողությունը, ընդ որում` ոչ միայն մեծերի, այլև փոքրերի։ Կոխլեար իմպլանտացիան այստեղ անում են նույնքան որակով, որքան Եվրոպայում կամ ԱՄՆ–ում։ Այսօր մամուլի ասուլիսի ժամանակ ասաց այս մասին «Նաիրի» բժշկական կենտրոնի քիթ-կոկորդ-ականջաբան Գայանե Սարգսյանը։
Կոխլեար իմպլանտացիան վիրաբուժական վիրահատությունն է, որը լսողության բնածին կամ ձեռքբերովի կորուստ ունեցող մարդկանց լսելու հնարավորություն է տալիս. լսողությունը վերականգնելու համար հատուկ սարքավորում է տեղադրվում պացիենտի ականջում։
«Կոխլեար իմպլանտացիան Հայաստանում անցկացվում է 2004 թվականից։ Լսողության պահպանման ու վերականգման համար գործում մեծ դերակատարություն ունի նորածինների համար նախատեսված սքրինինգային ծրագիրը», –ասաց Սարգսյանը։
Բժիշկը նշեց, որ նորածինների լսողությունը ստուգող ծրագիրը գործում է Հայաստանում 2018 թվականից։ Այն թույլ է տալիս խնդիրները հայտնաբերել վաղ փուլերում, հետո համապատասխան բուժում է սկսվում, սարք է դրվում կամ արդեն վիրահատություն է անցկացվում։
Սարգսյանն ընդգծեց, որ այսօր արդեն տարբերություն չկա` որտեղ կվիրահատվի երեխան` Հայաստանում, թե արտերկրում։ Հայ բժիշկները պատշաճ մակարդակով են անում այդ վիրահատությունները։
ՀՀ առողջապահության նախարարության Մոր և մանկան առողջության պահպանման վարչության պետ Կարինե Սարիբեկյանն էլ իր հերթին նշեց, որ 2008 թվականից ի վեր սքրինինգային ծրագրի շնորհիվ արդեն 150 հազար երեխայի լսողություն է ստուգվել։ 2018 թվականի տվյալներով` 199 երեխայի մոտ տարբեր խնդիրներ են հայտնաբերվել։
Միջազգային վիճակագրության համաձայն` 90 նորածնից մեկը լսողության խնդիրներ ունի։ Իմպլանտացիան թույլ է տալիս վաղ տարիքում լուծել այդ խնդիրները։
«Արդյունքում առողջ մարդ է մեծանում», –ասաց Սարիբեկյանը։
Ընդհանուր առմամբ, միջազգային վիճակագրության համաձայն, աշխարհում մոտ 500 միլիոն մարդ լսողության խնդիրներ ունեն։
Մասնագետները հորդորում են ուշադրություն դարձնել արտաքին գրգռիչներին, որոնք բացասական ազդեցություն են ունենում լսողության վրա։ Լսողությունը կարող է կտրուկ վատացնել փակ տարածքում կամ ականջակալնելով հնչող բարձր երաժշտությունը։
Հիշեցնենք` Առողջապահության համաշխարհային կազմակերպությունը ականջի ու լսողության հետ կապված խնդիրներ ունեցող մարդկանց նվիրված հատուկ օր է սահմանել, որը նշվում է ամեն տարի մարտի 3–ին։ Այդ օրն ամբողջ աշխարհում բժշկական ու բարեգործական կազմակերպությունները միջոցառումներ են անցկացնում և լսողության հետ կապված խնդիրների մասին իրազեկում բնակչությանը։