Առաջին արհեստական կին հաղորդավարն արդեն պատրաստ է եթերի. տեսանյութ

ԵՐԵՎԱՆ, 21 փետրվարի – Sputnik. Չինական Xinhua պետական լրատվական գործակալությունը ներկայացրել է առաջին վիրտուալ կին հաղորդավարին, որն արհեստական ինտելեկտ ունի։ Գործակալությունը լուրը հայտնել է Twitter–ի պաշտոնական էջում և տեսանյութ հրապարակել։

«Ես արհեստական ինտելեկտով առաջին կին հաղորդավարն եմ, ստեղծվել եմ Xinhua-ի և շարժիչների արտադրման չինական կազմակերպության` Sogou-ի համատեղ ջանքերի շնորհիվ»,– հայտնում է վիրտուալ հաղորդավարուհին։

Նա ավելացնում է նաև, որ իրեն անվանել են Սին Սյոմենգ, ձայնն ու արտաքին տվյալներն էլ մոդելավորվել են նույն գործակալության իրական հաղորդավարուհու` Կյու Մենգի տվյալների հիման վրա։

​Վիրտուալ հաղորդավարուհին պատրաստվում է լուրեր հայտնել Չինաստանի խորհրդարանի ամենամյա նիստի ժամանակ, որը կկայանա մարտին։

Նշենք, որ Սին Սյոմենգն «առաջին ծիծեռնակը» չէ։ Նրա տղամարդ գործընկերն արդեն հայտնվել է Համաշխարհային ինտերնետ–համաժողովի ժամանակ, որը կայացել է անցյալ տարվա նոյեմբերին Արևելյան Չինաստանի Չզեցյան նահանգում։