ԵՐԵՎԱՆ, 21 փետրվարի — Sputnik. ՀՀ կառավարությունն այսօրվա նիստում, վերջապես, ընդունեց աջակողմյան ղեկով ավտոմեքենաների ներմուծմանը վերաբերող սպասված օրինագիծը։
Այս որոշ փոփոխություններ է մտցնում «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» 2018թ.–ին ընդունված օրենքում։
Ինչպես կառավարության այսօրվա նիստում զեկուցեց ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը, հարցը ներկայացվել էր կառավարության նախորդ նիստում։ Բայց վարչապետի հանձնարարականից հետո օրենքի նախագծում որոշակի ուղղումներ են արվել։
«Պայմանը մեկն էր, որ այս հարցին այլևս չենք անդրադառնալու։ Այսինքն` Հայաստան այլևս աջակողմյան ղեկով ավտոմեքենաներ չեն ներկրվելու` այս խմբաքանակի ներմուծումից հետո»,– ասաց վարչապետը։
Ի տարբերություն նախկինում ներկայացված փաստաթղթի, այսօր կառավարության ընդունած նախագծով նախատեսվում է մինչև 2018 թվականի դեկտեմբերի 30-ը գնված աջ ղեկով ավտոմեքենաները Հայաստան ներկրել մինչև 2019 թվականի մայիսի 1-ը` ապրիլի 1-ի փոխարեն։
Կառավարության անդամները, սակայն, դարձյալ անհամաձայնություն հայտնեցին ավտոմեքենաների գնման ամսաթվի սահմանափակման վերաբերյալ։ Բնապահպանության նախարար Էրիկ Գրիգորյանը նշեց, որ դա կոռուպցիոն ռիսկ է ստեղծում, քանի որ ավտոմեքենայի գնման ամսաթիվն այսօր հնարավոր է շատ հեշտ փոխել ու ներկայացնել պահանջվող փաստաթղթերը։ Հետևաբար, նախարարն առաջարկեց նախագծից հանել գնման ամսաթվի պահանջը և սահմանել միայն ներկրման արգելքի ամսաթիվ։
Այս առաջարկի հետ, սակայն, կառավարության ղեկավարն ու անդամները չհամաձայնեցին։ «Նույնիսկ եթե ավտոմեքենան գնվել է 2014թ.-ին, եթե այն Հայաստան է բերվել 2019թ.–ի մայիսի 1-ից հետո, ապա չի ներմուծվելու»,– ասաց վարչապետը։
Նախագիծն ընդունվեց ու հրատապ կարգով ուղարկվեց ԱԺ` հաստատման։
Հիշեցնենք`կառավարության նախորդ նիստում նախարար Հակոբ Արշակյանը հայտարարել էր, որ արդեն գնված ու Հայաստան ուղարկվող շուրջ 412 ավտոմեքենաներ կան, մոտավորապես նույն քանակի ավտոմեքենաներ էլ այսօր արդեն Հայաստանի սահմանին են կուտակված (իսկ ընդհանուր թվով` 830):
«Ղեկը աջ» նախաձեռնության անդամների հետ հանդիպմանը Նիկոլ փաշինյանը հայտարարել էր, որ թույլտվության ժամկետի երկարացումը կվերաբերի միայն սահմանին գտնվող ավտոմեքենաներին։