ԵՐԵՎԱՆ, 19 փետրվարի — Sputnik. Զանգեզուրի պղնձամոլիբդենային կոմբինատն անօրինական կերպով գործից ազատել է ինժեներ Ռաֆիկ Խաչատրյանին։
Այս մասին այսօր լրագրողներին ասաց Խաչատրյանի փաստաբան Մհեր Բադալյանը։
Իրավաբանը նշեց, որ Խաչատրյանին գործից հանել են, երբ նա արձակուրդ եկած որդուն տարել է զորամաս։
«Խաչատրյանը սահմանված կարգով այդ օրը իր հաշվին արձակուրդ է խնդրել։ Սակայն կոմբինատում իր բացակայություն օգտագործել են որպես գործից ազատելու համար լավ առիթ», – ասաց Բադալյանը։
Խաչատրյանն իր հերթին պատմեց, որ մի քանի անգամ կտրուկ արտահայտվել էր կոմբինատում ու քաղաքում առկա բնապահպանական իրավիճակի մասին։ Այդ է պատճառը, որ կոմբինատի տնօրինությունը նրան գործից ազատելու առիթ էր փնտրում։
«Նրանք ուզում էին ազատվել ինձանից, ու դա նրանց հաջողվեց», – ասաց նա։
Իսկ կոմբինատից ասացին, որ Խաչատրյանին ազատել էին աշխատանքից 2016 թվականի նոյեմբերին կարգապահությունը խախտելու համար, այդ թվում` ենթակաների նկատմամբ ուժ կիրառելու համար։
«Գտնում ենք, որ նման գործելակերպով բանախոսների կողմից փորձ է արվում շեղել ուշադրությունը Ռ. Խաչատրյանի՝աշխատանքից ազատվման իրական պատճառներից՝ նրան ներկայացնելով որպես բնապահպանական խնդիրներով մտահոգված և գործատուի կողմից անարդարացի վերաբերմունքի արժանացած անձի: Նշվածի վառ ապացույց է հանդիսանում նաև այն, որ Ռ.Խաչատրյանն աշխատանքից ազատվել է իր կողմից հիշատակված դեպքերից ավելի քան մեկ տարի անց, իսկ նրա որդին 2018 թվականի սեպտեմբերին աշխատանքի է ընդունել «ԶՊՄԿ» ՓԲ ընկերությունում: Անընդունելի ենք համարում դատական քննության ընթացքում գտնվող վեճի փաստական հանգամանքների հրապարակային և խեղաթյուրված ներկայացնելը, ինչը, կարծում ենք, նպատակ է հետապնդում ճնշում գործադրել դատարանի վրա», – նշվում է կոմբինատի գրավոր մեկնաբանության մեջ։
Դատարանը շարունակում է քննել գործը։
Զանգեզուրի պղնձամոլիբդենային կոմբինատը Հայաստանի խոշորագույն հարկատուներից է։ Ընկերությունը շահագործում է Քաջարանի պղնձի ու մոլիբդենի հանքավայրը ու դրանց մետաղների հանքային կոնցենտրատներ է արտադրում։ Դրանք մասամբ մշակվում են Հայաստանում, իսկ զգալի մասը արտասահման է արտահանվում։