ԵՐԵՎԱՆ, 1 փետրվարի — Sputnik. «Նորք Մարաշ» զինված խմբի անդամները պետք է համաներվեն «Սասնա ծռերի» անդամներին հավասար, ուրբաթ լրագրողներին ասաց խմբի առաջնորդ Արթուր Վարդանյանի փաստաբան Լևոն Բաղդասարյանը։
Նրա խոսքով` Փաշինյանը բազմիցս հայտարարել է, որ դատական համակարգն անկախ է։ Վարչապետն այդ անկախության երաշխավորն է և պատասխանատվություն է կրում անօրինական գործողությունների համար։
Նրա խոսքով` քրեակատարողական հաստատություններում խախտվում են տասնյակ, հարյուրավոր բանտարկյալների իրավունքներ։ Օրինակներից մեկը «Նորք Մարաշ» խմբի անդամների իրավունքների խախտումն է։
«Նորագույն պատմության մեջ ես չեմ հիշում նման ուղիղ խտրականության դեպք։ Դա ընտրողական արդարադատություն է», – ասաց Բաղդասարյանը։
Նա վստահ է, որ խմբի դեմ գործը սարքված է, իսկ հասարակությանն ի սկզբանե համոզել են, որ դա ահաբեկչական խումբ է։
«Զինված խումբը, ունենալով բավականաչափ զենք, ոչ մի կրակոց չի իրականացրել։ Վարդանյանը 2015 թ.–ին ձերբակալվելուց հետո հայտարարել է, որ պատերազմ է լինելու և իշխանությունները ծրագրում են տարածքներ հանձնել։ Նա պայքարել է նախկին իշխանությունների առանձին գործողությունների դեմ», – ասաց Բաղդասարյանը։
Նրա խոսքով` խմբի առաջնորդ Արթուր Վարդանյանն անօրինական կերպով է գտնվում քննության տակ, ավելին նա Կռոնի հիվանդություն ունի (աղեստամքոսային տրակտի բորբոքիչ հիվանդություն)։
Ինչպես պարզաբանեց Բաղդասարյանը, դատական նիստերը տեղի են ունենում յուրաքանչյուր ուրբաթ, բայց դրանք ձևական բնույթ են կրում։ Վարդանյանը բուժում է ստանում, սակայն դա չի կարող արդյունավետ լինել բանտային պայմաններում։
Չնայած դրան` դատական համակարգի ներկայացուցիչները պնդում են, որ Վարդանյանն ազատության մեջ վտանգ է ներկայացնում։ Բաղդասարյանը կարծում է, որ Հայաստանում գրավի ինստիտուտը գրեթե չի կիրառվում։
«Ոչ ոք չի արձագանքում, երբ խոսում ես այդ ինստիտուտի մասին։ Քննություն իրականացնող մարմինը գործում է իր հայեցողությամբ», – ասաց Բաղդասարյանը։
Փաստաբանը հարց է տալիս, թե քանի մարդ պետք է մահանա բանտում, որպեսզի իշխանությունները հասկանան, որ խնդիրը գոյություն ունի։
Հիշեցնենք` 2015թ–ի նոյեմբերին Ազգային անվտանգության ծառայությունը հայտարարել էր, որ վնասազերծել է հանցախմբի 9 անդամների և նրանց ղեկավար Արթուր Վարդանյանին։ Հայտնաբերվել էր մեծ քանակությամբ զենք և զինամթերք։ ԱԱԾ–ն հայտնել էր նաև, որ այդ խումբը նպատակ ուներ ուժի կիրառմամբ զավթել երկրի իշխանությունը։ Այդ գործի շրջանակում 2015թ–ի դեկտեմբերին ձերբակալվել էր պաշտպանության նախկին նախարար Վահան Շիրխանյանը, որին մեղադրում էին զինված խմբին օգնելու մեջ։ Այս տարվա մայիսին իշխանափոխությունից հետո նա ազատ արձակվեց Հայաստանի խորհրդարանի երկու պատգամավորների անձնական երաշխավորությամբ։