ԵՐԵՎԱՆ, 30 հունվարի — Sputnik. Մոսկվայի ցուցաբերած աջակցության մակարդակով, որը դրսևորվում է ՄԱԿ-ի կայուն զարգացման ոլորտում նպատակներին հասնելու համար, Հայաստանն առաջին տեղում է արտասահմանյան գործընկերների շարքում։ Այս մասին հայտարարեց ՌԴ փոխարտգործնախարար Գրիգորի Կարասինը Երևանում ՌԴ դեսպանատանը կազմակերպած «Միջազգային զարգացմանն աջակցելու ոլորտում ՌԴ գործունեության մասին» սեմինարի ընթացքում։
Նրա խոսքով` Ռուսաստանը հետևողականորեն ընդլայնում է աջակցությունը ուղղված արտասահմանյան գործընկերների՝ ՄԱԿ-ի կայուն զարգացման ոլորտում իրենց նպատակներին հասնելուն։
«Առաջնային ուղղությունների թվում են ԱՊՀ, ԵԱՏՄ երկրները, որոնք ավանդաբար սերտ տնտեսական, մշակութային կապեր ունեն մեր երկրի հետ։ Նրանց շարքում, իհարկե, առաջին տեղում է Հայաստանի Հանրապետությունը», – նշեց Կարասինը։
Հայաստանում այդ ծրագիրը, նրա խոսքով, իրականացվում է երկկողմանի և բազմակողմանի հիմքով։ Երկկողմանի ծրագրերի պարագայում նպատակային ֆինանսական դրամաշնորհներ են հատկացվում, ապրանքների և ծառայությունների անհատույց մատակարարումներ են իրականացվում, մատչելի վարկեր տրամադրվում։
Բազմակողմանի աջակցությունն իրականացվում է միջազգային ինստիտուտների, ՄԱԿ–ի կառույցների հետ փոխգործակցությամբ։
«Հայաստանում Ռուսաստանի ֆինանսական աջակցմամբ տարբեր նախագծեր են իրականացվում առողջապահության, կրթության, շրջակա միջավայրի պահպանման, աղետների դեմ պայքարի, ինֆեկցիոն և ոչ ինֆեկցիոն հիվանդություններին հակազդելու, ինչպես նաև աղքատության դեմ պայքարի ոլորտներում», – ասաց Կարասինը։
ՄԱԶԾ–ի հետ Ռուսաստանի փոխգործակցության շրջանակում Հայաստանի տարածքում մի շարք նախագծեր են իրականացվում, այդ թվում ուղղված գյուղական շրջանների զարգացմանը։ Այդ նպատակով 5 մլն դոլար է հատկացվել։ Եվս 3 մլն դոլար ուղղված է զբոսաշրջության զարգացմանը։
UNAIDS–ի գծով աշխատանքներ են տարվում ՄԻԱՎ–ի և ՁԻԱՀ–ի վերահսկման ու կանխարգելման ոլորտում։ Նախագծի իրականացման համար 6 տարվա ընթացքում 16 մլն դոլար է հատկացվել։ 20 մլն–ից ավելի կազմում է դպրոցական սննդի հետ կապված կայուն զարգացման ոլորտում ՄԱԶԾ–ի ընդհանուր բյուջեն։
«2016 թվականից UNICEF–ի մանկական հիմնադրամի բյուջեի համար հատկացվել է 60 հազար դոլար նեոնատալ (նորածինների բժշկական խնամքի) ծառայությունների զարգացման համար: Հաջողությամբ իրականացվում են նախագծեր UNIDO, FAO ոլորտներում», – նշեց Կարասինը։
Նա հույս հայտնեց, որ Ռուսաստանի քաղաքականությունն այդ ուղղությամբ կամրապնդի երկու երկրների դաշնակցային գործընկերությունը։
Հայաստանում Ռուսաստանի դեսպան Սերգեյ Կոպիրկինն իր հերթին նշեց, որ ԱՊՀ տարածքում ՌԴ գործունեությունը, և մասնավորապես, Հայաստանի նման «մտերիմ» երկրում, միջազգային դաշտում տարվող աշխատանքի առաջնահերթ ուղղություններից մեկն է։
«ՄԱԿ–ի համակարգի ներկայացուցիչների հետ լավ փոխգործակցություն է հաստատվել։ Կարծում ենք, որ Ռուսաստանի կողմից ֆինանսավորվող ծրագրերի հաջողության առյուծի բաժինը իրենց է պատկանում։ Ռուսաստանը կշարունակի փոխգործակցել նրանց հետ և աջակցել ծրագրերի իրականացմանը», – ասաց Կոպիրկինը։
ՄԱԿ–ի համակարգի համար Հայաստանում Ռուսաստանը առանցքային և ռազմավարական գործընկեր է դարձել։ Երևանում ՄԱԶԾ մշտական ներկայացուցիչ Շոմբի Շարպն ավելացրեց, որ վերջին տարիներին Ռուսաստանն աջակցել է ՄԱԶԾ մի շարք ծրագրերի իրականացմանը։
2010 թվականից ի վեր Ռուսաստանի կողմից Հայաստանի աջակցության ընդհանուր ծավալը ՄԱԿ–ի գծով շուրջ 50 մլն դոլարի է հասել։