ԵՐԵՎԱՆ, 24 հունվարի — Sputnik. Վերաքննիչ դատարանը մի շարք խախտումներ է թույլ տվել ՀՀԿ–ական նախկին պատգամավոր, գեներալ–լեյտենանտ Մանվել Գրիգորյանի կրկնակի կալանքի մասին որոշման ընթացքում։ Այս մասին այսօր հայտարարեց Գրիգորյանի փաստաբան Լևոն Բաղդասարյանը` կոչ անելով ՀՀ վարչապետ Նիկոլ Փաշինյանին հանձնարարել ԱԱԾ–ին ստուգել հանձնաժողովի որոշումները, ինչպես նաև Գրիգորյանին ազատելու դեմ բողոքի ակցիաների մասնակիցներին։
Վերաքննիչ դատարանը հունվարի 22-ին որոշեց կրկին կալանավորել Գրիգորյանին` բավարարելով գրավի կիրառումն անթույլատրելի ճանաչելու մասին դատախազության միջնորդությունը։ 2018 թվականի դեկտեմբերի 21-ին գեներալն ազատ էր արձակվել 25 մլն դրամ գրավի դիմաց, որից հետո հանրահավաքներ և երթեր էին սկսվել` նրան մեկուսարան վերադարձնելու պահանջով։ Որոշումից հետո Գրիգորյանն իր կամքով է վերադարձել «Երևան–Կենտրոն» ՔԿՀ։
Նրա խոսքով` ՀՀ վարչապետը պետք է ընտրողական արդարադատության բացառման երաշխավոր լինի։ Փաշինյանը պետք է պատժի «դատավորներին և պետական մարմիններին հանցավոր կապերի» համար։
«Եթե կա գոնե մեկ ապացույց, որ Գրիգորյանն ազատության մեջ կարող է թաքնվել կամ հանցագործություն կատարել, թող այդ փաստը ներկայացնեն պաշտպանությանը և դատապարտեն ցմահ կալանավորման։ Հակառակ դեպքում, նրան կալանքի տակ պահելն անօրինական և բարոյազուրկ է», – ասել է Բաղդասարյանը։
Գրիգորյանը, իր խոսքով, շահագրգռված է, որ թափանցիկ և օբյեկտիվ հետաքննություն անցկացվի։ Փաստաբանն այնքան վստահ է, որ գեներալը առնչություն չունի իրեն վերագրվող հանցագործություններին, որ պատրաստ է անձամբ միջնորդություն ներկայացնել առավելագույնս խիստ պատիժ կիրառելու մասին, եթե մեղադրանքները ճիշտ լինեն։
Միևնույն ժամանակ, Բաղդասարյանը նշեց, որ դատարանն ինքն է օրենքի խախտումներով աշխատում։ Մասնավորապես, դատավորը կալանքի ժամկետը երկարաձգելու և գրավի դիմաց ազատելու մասին Գրիգորյանի գործը Վերաքննիչ դատարանում վարույթ է ընդունել օրենքի խախտումներով։
«Նմանօրինակ գործերը պետք է մակագրվեն ծրագրի միջոցով, այլ ոչ թե անձի», – նշեց Բաղդասարյանը` հայտարարելով, որ մեղավորները պետք է պատիժ կրեն։
Փաստաբանն ուշադրություն է հրավիրել ճաղերի հետևում Գրիգորյանի առողջական վիճակի բացասական փոփոխություններին վրա, ինչը հաշվի չէր առնվել պետական միջգերատեսչական հանձնաժողովի կողմից։ Հանձնաժողովը, իր հերթին, պնդում է, որ Գրիգորյանի առողջությունը կարող էր վատթարանալ, նույնիսկ եթե նա բանտում չլինի։
Բաղդասարյանն ընդգծել է, որ նա պաշտպանում է ոչ թե անձամբ Գրիգորյանին, այլ նրա իրավունքները։
Հիշեցնենք, որ «Երկրապահ» կամավորական միության նախկին նախագահ, պատգամավոր Մանվել Գրիգորյանին առաջին անգամ կալանավորել էին (պատգամավորական անձեռնմխելիությունից զրկելուց հետո) 2018 թվականի հունիսին` ապօրինի զենք պահելու և զինվորների համար նախատեսված պարենամթերքը յուրացնելու մեղադրանքով։
2018թ–ի հունիսի 17-ին ԱԱԾ–ն տեսանյութ էր հրապարակել` ներկայացնելով ԵԿՄ նախագահ Մանվել Գրիգորյանին պատկանող ՀՀ Արմավիրի մարզի Արշալույս գյուղի Լճափնյա փողոցում գտնվող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Մանվել Գրիգորյանը մեղադրվում է ապօրինի կերպով ռազմամթերք ձեռք բերելու և պահելու, ինչպես նաև առանձնապես խոշոր չափերով գույք հափշտակելու մեջ։
Հիշեցնենք նաև, որ Երևանի ընդհանուր իրավասության դատարանը դեկտեմբերի 21-ին 25 մլն դրամ գրավի դիմաց որոշում էր կայացրել ազատ արձակել գեներալ-լեյտենանտ Մանվել Գրիգորյանին։ Դրանից անմիջապես հետո Էջմիածնում բողոքի ակցիաներ էին սկսվել։ Ինքնադատաստանի հնարավոր փորձերը կանխելու նպատակով, Գրիգորյանին տեղափոխել են Արմավիրի մարզի Ակնալիճ գյուղ, որտեղ նա առանձնատուն ունի։ Ոստիկանությունն այնտեղ շուրջօրյա վերահսկողություն է իրականացնում։
ՀՀ Գլխավոր դատախազությունը դեկտեմբերի 24-ին վերաքննիչ բողոք է ներկայացրել` Մանվել Գրիգորյանի նկատմամբ կիրառված խափանման միջոցը փոխելու որոշման դեմ։ Դատարանը դատախազության բողոքն ընդունվել է վարույթ։
Վերաքննիչ դատարանը հունվարի 22-ին որոշում է կայացրել կրկին կալանավորել Մանվել Գրիգորյանին։