ԵՐԵՎԱՆ, 17 հունվարի — Sputnik. Վերաքննիչ դատարանում այս պահին ընթանում է ԱԺ նախկին պատգամավոր Մանվել Գրիգորյանի գործով դատական նիստը։ Նիստից առաջ փաստաբան Արմեն Մկրտչյանն ասաց, որ տեղեկություն չունի` իր պաշտպանյալը կմասնակցի նիստին, թե ոչ։ Նրա առողջական վիճակի մասին հարցին փաստաբանը պատասխանեց` առաջվա պես վատ։
Դատարանի բակում դարձյալ հավաքված են քաղաքացիներ, ովքեր դատարանից պահանջում են կալանավորել Մանվել Գրիգորյանին։ Լրատվամիջոցների հետ զրույցում բողոքի ակցիայի մասնակիցները հայտնեցին, որ անկախ դատարանի որոշումից ճանապարհներ այլևս չեն փակի։
«Մենք որևէ կլանի չենք պատկանում ու որևէ կլանի դիրքորոշում չենք ներկայացնում»,– ասացին ցույցի մասնակիցները` արձագանքելով վարչապետ Նիկոլ Փաշինյանի հայտարարությանն այն մասին, որ ցուցարարները չպիտի փողոցներ փակեն և որ որոշ կլանային ուժեր օգտվում են այդ բողոքի ակցիաներից։
Վերաքննիչ դատական նիստում այսօր քննվելու է Մանվել Գրիգորյանի կալանավորումը 25 միլիոն դրամ գրավով փոխարինելու մասին ընդհանուր իրավասության դատարանի որոշման դեմ դատախազության ներկայացրած բողոքը։
Հիշեցնենք, որ «Երկրապահ» կամավորական միության նախկին նախագահ, պատգամավոր Մանվել Գրիգորյանին կալանավորել էին (պատգամավորական անձեռնմխելիությունից զրկելուց հետո) 2018 թվականի հունիսին` ապօրինի զենք պահելու և զինվորների համար նախատեսված պարենամթերքը յուրացնելու մեղադրանքով։
2018թ.–ի հունիսի 17-ին ԱԱԾ–ն տեսանյութ էր հրապարակել` ներկայացնելով ԵԿՄ նախագահ Մանվել Գրիգորյանին պատկանող ՀՀ Արմավիրի մարզի Արշալույս գյուղի Լճափնյա փողոցում գտնվող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Դատական նախորդ նիստի ընթացքում` հունվարի 11-ին Վերաքննիչ դատարանի բակում հավաքված ակտիվիստները թքել էին Մանվել Գրիգորյանի փաստաբան Արսեն Մկրտչյանի մեքենայի վրա, ապա դրա վրա ներկ էին լցրել։