ԵՐԵՎԱՆ, 15 հունվարի — Sputnik. Նիկոլ Փաշինյանին շնորհավորել են նաև հարևան Իրանից։ Ինչպես տեղեկացնում են ՀՀ կառավարության մամուլի ծառայությունից, Հայաստանի Հանրապետության վարչապետի պաշտոնում նշանակվելու կապակցությամբ Նիկոլ Փաշինյանին շնորհավորական ուղերձ է հղել Իրանի Իսլամական Հանրապետության նախագահ Հասան Ռոհանին:
«Ձերդ գերազանցություն, սրտանց շնորհավորում եմ Ձեզ Հայաստանի Հանրապետության վարչապետի պաշտոնում նշանակվելու կապակցությամբ:
Հուսով եմ, որ Ձեր վերանշանակումը կնպաստի երկկողմ, տարածաշրջանային և միջազգային ոլորտներում մեր զարգացող հարաբերությունների ընդլայնմանը և խորացմանը»,–գրել է Ռոհանին:
Վերջում հարևան և բարեկամ երկրի նախագահը մաղթել է առողջություն և հաջողություն, իսկ Հայաստանի Հանրապետության բարեկամ ժողովրդին՝ բարգավաճում և բարօրություն:
Հիշեցնենք` Նիկոլ Փաշինյանին վարչապետի պաշտոնում նշանակվելու կապակցությամբ արդեն շնորհավորել են Ռուսաստանի և Բելառուսի նախագահները, Վրաստանի վարչապետը, Շվեդիայի փոխվարչապետն ու Արցախի նախագահը։