ԵՐԵՎԱՆ, 15 հունվարի — Sputnik. Երևանի քաղաքապետարանի որոշումը` Սպենդիարյանի անվան օպերային և բալետի ազգային ակադեմիական թատրոնի շենքի շրջակայքը կանաչապատելու և «առաջին գծում» գտնվող սրճարանները քանդելու մասին, վերջնական է և անբեկանելի։ Այս մասին այսօր լրագրողների հետ զրույցում ասաց Երևանի քաղաքապետ Հայկ Մարությանը։
Նա հերքեց տեղեկատվությունն այն մասին, որ նման որոշումն ընդունվել է հատուկ մի քանի օբյեկտներ քանդելու համար, որոնք, ոչ պաշտոնական վարկածով, պատկանում են նախկին իշխանության ներկայացուցիչներին։ Մարությանի խոսքով`Հայաստանում պետական կառույցները չեն կատարում քայլեր` ուղղված ընկերության դեմ, եթե այն չի խախտում օրենքը ։
«Տարիներ շարունակ խոսակցություններ կան, որ գրավել են օպերայի հարակից տարածքները, սա մշակութային օջախ է։ Դուք շատ լավ ծանոթ եք երևանցիների վերաբերմունքին, և վերջապես եկել է մի իշխանություն, որի ձեռքերն ազատ են, կապված չէ ոչ մեկից և ոչ մի բանից, և նա կարողանում է իրագործել երևանցիների ցանկությունը», – բացատրեց քաղաքապետը։
Նա չհերքեց, որ այդ հատվածում գործող տնտեսվարող սուբյեկտները պայմանագրեր ունեն քաղաքապետարանի հետ։ Մարությանը հավելեց, որ քաղաքային իշխանությունները գործելու են օրենքի շրջանակում և փաստաթղթերին համապատասխան։
Ավելի վաղ տեղեկություն է հայտնվել օպերային և բալետի թատրոնի շենքի մոտ գտնվող բոլոր սրճարանները և ռեստորանները քանդելու մասին։ Որոշումը քննարկվում է քաղաքի կանաչապատման որոշման նախագծի շրջանակում։ Հաստատությունների տերերի մեծ մասը համաձայն չէ քաղաքապետարանի որոշման հետ։ Քանդելու դեպքում գործարարները մտադիր են փոխհատուցում պահանջել։