ԵՐԵՎԱՆ, 7 հունվարի — Sputnik, Արմենուհի Մխոյան. Գյումրիում 5 ամսական երեխայի մահվան գործով նյութեր են նախապատրաստվում: Այս մասին Sputnik Արմենիային տեղեկացրեց Շիրակի մարզի դատախազ Կարեն Գաբրիելյանը` փաստելով, որ նյութերը նախապատրաստվում են երեխայի հոր հաղորդագրության հիման վրա:
«Նշանակվել է դիակի դատաբժշկական փորձաքննություն՝ մահվան հանգամանքները պարզելու ուղղությամբ։ Օրենքով նախատեսված նյութերի նախապատրաստման թույլատրելի ժամկետը լրանալուց հետո կկայանա քրեական գործ հարուցելու կամ մերժելու մասին որոշում: Փորձաքննության եզրակացության արդյունքներից ելնելով՝ կհստակեցվի, թե որն է եղել փոքրիկի մահվան պատճառը: Բժիշկների կողմից ենթադրյալ չարաշահումներ կամ բացթողումներ կատարելու հարցերը պարզելու համար ևս անհրաժեշտ է փորձաքննության եզրակացությունը»,-նշեց դատախազը` հավելելով,որ այս պահին այլ հանգամանքներ դեռ պարզված չեն:
Նշենք, որ դեպքը գրանցվել էր հունվարի 5-ին «Գյումրու Մոր ու մանկան ավստրիական մանկական հիվանդանոցում»: Երեխայի հայրը հաղորդագրություն էր ներկայացրել, որ երեխայի մահը տվյալ բուժհաստատության բուժանձնակազմի անբարեխիղճ աշխատանքի ու անփութության պատճառով է գրանցվել:
Գյումրիում տոնական օրերին արձանագրվել է նաև գողության մի քանի դեպք, դրանցով նույնպես նյութեր են նախապատրաստվում: «Նախապատրաստվում են նյութեր, ինչպես նաև արդեն կա հարուցված քրեական գործեր»,-նշեց Կարեն Գաբրիելյանը: Ի դեպ, գողերն իրենց համար թիրախ ընտրել էին այն բնակարանները, որոնց տերերը տոնական օրերը որոշել էին նշել ոչ Գյումրիում։
Նշենք, նաև, որ դեկտեմբերի 31-ին Գյումրիում ճայթունների հետևանքով մարմնական վնասվածքներ են ստացել տարբեր տարիքի անչափահաս երեխաներ: Դատախազը տեղեկացրեց, որ այս փաստերով նույնպես նյութեր են նախապատրաստվում: