ԵՐԵՎԱՆ, 31 դեկտեմբերի – Sputnik. Դեկտեմբերի 29-ին, ժամը 21.55-ին, ոստիկանության Շենգավիթի բաժնից Նաիրիի ոստիկանություն հաղորդում է ստացվել, որ «աջ նստաթմբի հրազենային վնասվածք» ախտորոշմամբ «Սուրբ Աստվածամայր» բժշկական կենտրոն բուժօգնության է տեղափոխվել Նոր Երզնկա գյուղի բնակչուհի, 9-ամյա Լիաննա Գ.-ն:
Ոստիկանությունը հայտնում է, որ ըստ նրա ծնողների հայտարարության` վնասվածքը ստացել է հոր պատահական կրակոցից:
Ոստիկանության Նաիրիի բաժնի ծառայողների ձեռնարկած միջոցառմամբ պարզվել է, որ աղջիկը վնասվածքը ստացել է նույն օրը, ժամը 15.00-ի սահմաններում, երբ հայրը՝ 41-ամյա Հայկ Գ.-ն, իր անվամբ գրանցված «ՄՌ 155» տեսակի որսորդական ողորկափող հրացանը հյուրասենյակում մաքրելիս պատահաբար կրակել է:
Հրացանը վերցվել, փաթեթավորվել և ուղարկվել է դատաձգաբանական փորձաքննություն:
Նախապատրաստվում են նյութեր: