ԵՐԵՎԱՆ, 28 դեկտեմբերի — Sputnik. ՀՀ Կրթության և գիտության նախարարությունը կասկածի տակ է դնում իր կատարած ուսումնասիրության անաչառությունը։ Այս մասին հայտնում են «Այբ» կրթական հիմնադրամից` հավելելով, որ «Այբ» հիմնադրամը ԿԳՆ-ից չի ստացել որևէ պաշտոնական եզրակացություն:
Հիշեցնենք, որ ԿԳՆ–ն երեկ` դեկտեմբերի 27-ին, հաղորդագրություն էր տարածել` տեղեկացնելով, որ «Արարատյան բակալավրիատ» ծրագրի ուսումնասիրության ընթացքում ի հայտ են եկել ծրագրային և ֆինանսական անհամապատասխանություններ։
«ՀՀ կրթության և գիտության նախարարությունը հերթական անգամ դրսևորեց նույն գործելաոճը և մինչև «Արարատյան բակալավրիատ» ծրագրի վերաբերյալ ուսումնասիրության վերջնական ամփոփումը կրկին ներկայացրեց հանրությանն իր կարծիք-գնահատականը։ Այդպես էր ութ ամիս առաջ, այդպես է հիմա»,–ասված է «Այբ»–ի տարածած հաղորդագրության մեջ։
Հիմնադրամից տեղեկացրել են, որ մինչ օրս նախարարությունից չեն ստացել ուսումնասիրությունների և դրանց արդյունքների վերաբերյալ որևէ պաշտոնական կամ գրավոր եզրակացություն: «Առանց ուսումնասիրվող կողմի կարծիքը լսելու և մեկնաբանություններն ունենալու՝ ուսումնասիրության մասին տեղեկություն տարածելը կասկածի տակ է դնում այն կատարողի անաչառությունը և ուսումնասիրության արդյունքները: Վերջին ութ ամիսների ընթացքում «Արարատյան բակալավրիատ» ծրագրի վերաբերյալ տարածվել են բազմաթիվ ապատեղեկաություններ, որոնք հետագայում հերքվել են հենց տարածողների կողմից:
«Արարատյան բակալավրիատ» ծրագիրը փակվել է առանց ուսումնասիրության ու հանրային լսումների, և տպավորություն է ստեղծվում, թե նախարարությունը փորձում է հետին թվով «հիմնավորել» ծրագրի փակումը: Մենք սպասում ենք ուսումնասիրության արդյունքներին, պատրաստ ենք հայտնելու մեր դիրքորոշումը և տալու մեր հիմնավորումները բոլոր «խնդրահարույց» կետերի վերաբերյալ»,–ասված է հաղորդագրության մեջ:
Հիմնադրամն առաջարկում է Արարատյան բակալավրիատի ստեղծմանն ու փաստերին ծանոթանալ այս տեսանյութում։