Սփյուռքի նախարարությունը գերատեսչության լուծարման վերաբերյալ իր մտահոգություններն ու առաջարկություններն աշխատանքային սահմանված ընթացակարգով ներկայացրել է ՀՀ արդարադատության նախարարությանը։ Այս մասին այսօր լրագրողներին ասաց ՀՀ սփյուռքի նախարարի պաշտոնակատար Մխիթար Հայրապետյանը:
«Այս հարցի վերաբերյալ մենք ունենք մտահոգություններ, որովհետև հստակ չի նշվում, թե այդ գործառույթները, որոնք իրականացնում է Սփյուռքի նախարարությունը, որ գերատեսչությունն է ստանձնելու, հետևաբար դրա լուծարման վերաբերյալ մտահոգությունները քաղաքական թիմին էլ ենք հայտնել։ Ես կիսում եմ մեր աշխատակիցների մտահոգությունները», - նշեց Հայրապետյանը:
Նա անդրադարձավ նաև «Կառավարության կառուցվածքի ու գործունեության մասին» ՀՀ օրենքում փոփոխություններ և լրացումներ անելու մասին նախագծին։
«Ես ինձ թույլ կտամ ասել, որ փաստաթղթում կլինեն փոփոխություններ՝ հիմնված թե մեր, թե մյուս նախարարությունների մտահոգությունների վրա»,– ասաց նա:
Հայրապետյանը հրաժարվեց ասել, թե որ գերատեսչությունը կկատարի Սփյուռքի նախարարության գործառույթները։ «Կարծում եմ՝ դեպարտամենտ կլինի»,– ասաց նա։
Հիշեցնենք, որ դեկտեմբերի 10-ին, արտասահմանյան լրատվամիջոցների հետ հանդիպմանը ՀՀ վարչապետի պաշտոնակատար Նիկոլ Փաշինյանը հայտնել էր, որ նախարարությունների թիվը կառավարությունում պետք է կրճատվի 17-ից 12-ի։
Մշակույթի և Սփյուռքի նախարարությունների ղեկավարները դեկտեմբերի 20-ին աշխատակազմի ժողովներում հայտարարել էին սպասվող կրճատումների մասին` նշելով, որ որոշ աշխատակիցներ 2019թ–ի հունվարի 1-ից կարող են աշխատանքի չգալ։
Դրա հետևանքով նախարարությունների մի քանի տասնյակ աշխատակիցներ գործադուլ էին հայտարարել ու բողոքի ակցիա կազմակերպել` ընդդեմ կառավարության այդ ծրագրի։