ԵՐԵՎԱՆ, 26 դեկտեմբերի — Sputnik. Չնայած վերջին շրջանում արցախա-ադրբեջանական հակամարտ զորքերի շփման գծում կողմերի միջև ձեռքբերված բանավոր պայմանավորվածությանը, հակառակորդը շարունակում է առաջնագծի տարբեր հատվածներում ինտենսիվորեն խախտել հրադադարի պահպանման ռեժիմը: Իսկ որոշ ուղղություններում ադրբեջանական կողմն իրականացնում է նաև ռազմավարամարտավարական նշանակության սադրիչ գործողություններ:
Այս մասին ասվում է ԱՀ ՊՆ մամուլի հաղորդագրության մեջ:
«ՊԲ առաջապահ ստորաբաժանումներն առայժմ ձեռնպահ են մնում դիմել պատասխան քայլերի, սակայն պատրաստակամ են ադրբեջանական զինուժի կողմից դրսևորվող նման վարքագծի շարունակման դեպքում ձեռնարկել իրավիճակից բխող համարժեք գործողություններ:
Արցախի Հանրապետության պաշտպանության նախարարությունը հորդորում է ադրբեջանական կողմին ձեռնպահ մնալ շփման գծում իրավիճակը սրելու անհեռանկար գործողություններից և, գոնե, տոնական օրերին հետևել հրադադարի ռեժիմի պահպանման շուրջ կողմերի միջև ձեռք բերված բանավոր պայմանավորվածության պահանջներին»,- ասվում է հաղորդագրության մեջ: