ԵՐԵՎԱՆ, 20 դեկտեմբերի — Sputnik. ՀՀ սփյուռքի ու մշակույթի նախարարություններում բոլոր աշխատակիցների մասնակցությամբ ժողովներ են անցկացրել, որոնց ընթացքում հայտնել են գերատեսչությունների լուծարման մասին։ Sputnik Արմենիային այս տեղեկությունը փոխանցել է նախարարություններին մոտ կանգնած աղբյուրը։
Մենք փորձեցինք կապ հաստատել երկու գերատեսչությունների ներկայացուցիչների հետ, սակայն սփյուռքի նախարարությունում զերծ են մնում մեկնաբանություններից, իսկ մշակույթի նախարարությունում զանգերին չեն պատասխանում։ Ամենայն հավանականությամբ, ժողովը դեռ չի ավարտվել։
Ավելի վաղ տեղեկացրել էին, որ կառավարության կառուցվածքի վերաձևավորման արդյունքում ՀՀ նախարարությունների թիվը 17–ից կհասնի 12–ի։ Փոփոխությունների համաձայն` լուծարվելու է սփյուռքի նախարարությունը։ Տրանսպորտի, կապի ու տեղեկատվական տեխնոլոգիաների նախարարությունը կդառնա կապի ու բարձր տեխնոլոգիաների նախարարություն։ Տնտեսական զարգացման ու ներդրումների և գյուղատնտեսության նախարարությունները կմիավորվեն։ Աշխատանքի ու սոցիալական հարցերի նախարարությունը կմիանա տարածքային կառավարման ու զարգացման նախարարությանը։
Մշակույթի, սպորտի ու երիտասարդության նախարարությունները կմիավորվեն կրթության և գիտության նախարարությանը։ Որպես առանձին գերատեսչություններ շարունակելու են գործել ֆինանսների, արդարադատության, առողջապահության ու բնապահպանության նախարարությունները։