Նանա Մարտիրոսյան, Sputnik Արմենիա
Մի քանի ավանդական տարբերակ կա. դիմավորել Ամանորը ռեստորանում, տարբեր ուտեստներից ճկվող սեղանի շուրջ և երրորդ` հանգստի մեկնել արտերկիր կամ քաղաքից դուրս:
Թվում է թե, ամենաբյուջետային տարբերակը պետք է վերջինը լինի, սակայն Հայաստանի պարագայում դա այդպես չէ, եթե իհարկե Ծաղկաձորում կամ Ջերմուկում ամառանոց չունեք: Այդ ուղղություններով տարբեր հանգստյան տներում և հյուրանոցներում զբոսաշրջային փաթեթների աստղաբաշխական ամանորյա գների մասին արդեն երկար տարիներ լեգենդներ են հյուսվում: Գործը հասել է նրան, որ հայերը գերադասում են հանգստանալ արտերկրում, քան հայրենիքի մարզերում:
Ինչպես պատմում է զբոսաշրջային գործակալություններից մեկի տնօրեն Սեդա Աղբալյանը, տոներին 5-օրյա ընտանեկան (2 մեծ և երեխաներ) հանգիստը Ծաղկաձորում կարժենա մոտ 1800 դոլար, այն էլ ամենամատչելի հյուրանոցներից մեկում:
Գնի մեջ ներառված է Ամանորի գալա ընթրիքը և կեցության օրերի սնունդը: Ընդ որում` նույն կատեգորիայի հյուրանոցում նույնպիսի ընտանիքի համար հարևան Վրաստանում ամանորյա հանգիստը 100 հազար դրամով մատչելի կլինի: Գրեթե նույնքան կարժենք հանգիստը Եգիպտոսի բարձրակարգ հյուրանոցում: Եվրոպական ուղղություններն այս տարի Ամանորին այդքան էլ պահանջված չեն:
«Եվրոպական երկրների հետ կապված մատչելի լինելուց բացի նաև վիզա ստանալու հետ կապված անհարմարություններ կան: Մարդիկ հոգնել են այդ երկարատև և երբեմն նույնիսկ վիրավորական գործընթացից», - նշեց նա:
Մեկ այլ տուրիստական գործակալության տնօրեն Նանե Սարգսյանը նշեց, որ հարմար տարբերակ կարելի է գտնել նույն Ծաղկաձորում, որտեղ 5-օրյա հանգիստը մեկ անձի համար տոներին մոտավորապես 150-170 հազար դրամ կկազմի:
Գները տարբերվում են կախված հաստատության մակարդակից: Գնի մեջ մտնում է դեկտեմբերի 31-ի գալա ընթրիքը և մյուս օրերի երկանգամյա սնունդը:
«Տոներից առաջ նույն հյուրանոցներում հանգիստն արժեր մոտ 15 հազար դրամ օրական, գրեթե կրկնակի էժան», - ասաց նա:
Սարգսյանը չբացառեց, որ թանկացումը կապված է մեծ պահանջարկի հետ: Ամանորի տոներին զբոսաշրջիկներ են գալիս նաև Ռուսաստանից, Իրանից, եվրոպական երկրներից: Այս տարի գործակալության տնօրենը զբոսաշրջիկներ է սպասում նաև Եգիպտոսից, նրանք ուզում են ձյուն տեսնել, զգալ ցուրտը, տեսնել զարդարված տոնածառերը:
Լիլիթ Մուրադյանը, որ ներկայացնում է տեղական տուրիստական գործակալություններից մեկը, պատմեց, որ Եգիպտոսում, ԱՄԷ-ում և Թաիլանդում Նոր տարին կարելի է անցկացնել 700-1300 դոլարով մեկ անձի համար բարձրակարգ հյուրանոցներում և տոնական շատ հետաքրքիր շոու ծրագրով: Ավելի թանկ կարժենա արձակուրդը Ավստրալիայում, Չեխիայում, Գերմանիայում, Իսպանիայում և Ֆրանսիայում, որտեղ պահպանվել են Սուրբ ծնունդը առանձնակի ճոխ նշելու ավանդույթները:
«Վրաստանում ևս կարելի է լավ հանգստանալ մեկ անձի համար վճարելով ընդամենը 165 դոլար: Սա ամենապահանջված տարբերակն է, նույնիսկ հայաստանյան ձմեռային զբոսավայրերի համեմատ», - նշեց նա:
Մեկ այլ գործակալությունում նշեցին, որ Ամանորի տոներին մեծ պահանջարկ է վայելում հանգիստը Ջերմուկում: 5-օրյա հանգստի գներն այնտեղ սկսում են 130 հազար դրամից: Մի փոքր ավելի մատչելի կարելի է հանգստանալ Աղվերանում, Արզնիում, Ստեփանավանում: Այստեղ զբոսաշրջային փաթեթների արժեքը սկսում է 100-120 հազար դրամից: Գումարի մեջ ներառված է Ամանորի գալա ընթրիքը և երկանգամյա սնունդը:
Իսկ արտասահմանյան զբոսավայրերից ամենապահանջվածը Միացյալ Արաբական Էմիրություններն են, որտեղ երեք աստղանի հյուրանոցում հանգստի մեկ օրը երեքանգամյա սննդով և գալա ընթրիքով կարժենա 48 հազար դրամ:
Միևնույն ժամանակ մեկ այլ տուրիստական գործակալության հիմնադիր Տիգրան Շահբազյանը «Ամանորի խնդրի» այլընտրանքային լուծում է առաջարկում: Արդեն մի քանի տարի է նա խմբային տուրեր և արշավներ է կազմակերպում Ամանորին Հայաստանի մարզեր: Այս տարի, նրանց խումբը Վայոց Ձորի մարզ է մեկնելու: Էքստրիմի սիրահարներն ընդամենը 39 հազար դրամի դիմաց երեք օր կանցկացնեն Արենի գյուղի մոտ գտնվող հյուրատանը, երկու արշավի կմասնակցեն և օրիգինալ ձևով կդիմավորեն Նոր տարին ընկերական մթնոլորտում, հավանաբար նաև խարույկի մոտ:
Ընդ որում՝ սնունդը գումարի մեջ ներառված չէ, սակայն, Շահբազյանի խոսքով, մասնակիցները սննդի վրա մոտ 10 հազար դրամ են ծախսում:
Հաշվի առնելով, որ Հայաստանում միջին աշխատավարձը 166 104 դրամ է, մարզում հանգիստն անցկացնելը հազիվ թե կարելի է մատչելի անվանել: