ԵՐԵՎԱՆ, 10 դեկտեմբերի — Sputnik. Արմավիր քաղաքի մի բնակչուհի, դեկտեմբերի 9-ին ՀՀ ոստիկանության Արմավիրի բաժնում հաղորդում է տվել այն մասին, որ աշխատավայրում իր անմիջական ղեկավարը՝ սննդի օբյեկտի տնօրենն իրեն հարկադրել է դեկտեմբերի 9-ի Ազգային ժողովի ընտրությունների ժամանակ կողմ քվեարկել առաջադրված պատգամավորության թեկնածուներից մեկի օգտին:
Իսկ երբ իմացել է, որ իր մատնանշած անձին չի ընտրել, աշխատակցուհուն ասել է այլևս աշխատանքի չգալ: Այս մասին հայտնում են ՀՀ քննչական կոմիտեից։
Կինը նաև հայտնել է, որ 2018թ. հոկտեմբերի 21-ին կայացած Արմավիրի քաղաքապետի ընտրությունների օրը տնօրենը նույն կերպ իրեն պարտադրել է քվեարկել քաղաքապետի թեկնածուներից մեկի օգտին:
Կնոջ հաղորդման հիման վրա Արմավիրի մարզային քննչական վարչությունում հարուցվել է քրեական գործ`ՀՀ քրեական օրենսգրքի 154.2-րդ հոդվածի 3-րդ մասով, այն է` ծառայողական կամ այլ կախվածությունն օգտագործելով ընտրողին թեկնածուներից որևէ մեկի օգտին կողմ քվեարկելուն հարկադրելը։
Քրեական գործը նախաքննությունը կիրականացնի ՀՀ հատուկ քննչական ծառայությունը: