ԵՐԵՎԱՆ, 29 նոյեմբերի — Sputnik. Մենք պետք է փորձենք խնդրին լուծում տալ այսօր, այլապես ձեր և մեր երեխաները տարիներ անց ստիպված են լինելու նույն հարցը տալ։ Այս մասին Հանրապետության նախագահ Արմեն Սարգսյանն ասել է Օտտո-ֆոն Գուերիկեի համալսարանում՝ պատասխանելով ադրբեջանցի ուսանողի՝ Արցախյան հակամարտության թեմայով հարցին:
Նա շեշտել է, որ ողբերգություն է այն, ինչ տեղի է ունեցել Հայաստանում, Ադրբեջանում և Լեռնային Ղարաբաղում: Չեմ ցանկանում հետ գնալ դեպի պատմություն:
«Հայաստանն ունի նոր կառավարություն և նոր սահմանադրություն: Ես պետության գլուխն եմ, սակայն կառավարության ղեկավարը չեմ: Հիմա Հայաստանը նման է Գերմանիային: Սահմանադրությամբ կառավարության ղեկավարը պետք է բանակցի Իլհամ Ալիևի հետ: Իմ դերակատարումը կարող է լինել խորհուրդներ տալը»:
Ուզում եմ մի կարևոր բան շեշտել. մարդիկ են մահացել ոչ միայն Ադրբեջանում, այլև Լեռնային Ղարաբաղում և Հայաստանում: Կարծում եմ՝ պետք է անենք հնարավոր ամեն բան՝ ստեղծելու արդար և խաղաղ միջավայր խնդրին լուծում տալու համար:
Արդյո՞ք դա հեշտ է տրվելու՝ ոչ: Սակայն մենք պետք է փորձենք դա անել այսօր, այլապես ձեր և մեր երեխաները տարիներ անց ստիպված են լինելու նույն հարցը տալ։
Ուստի ժամանակն է լուծել խնդիրը»։
Հիշեցնենք, որ նախագահ Արմեն Սարգսյանը Գերմանիայի Սաքսոնիա-Անհալթ երկրամասի Օտտո-ֆոն Գուերիկեի համալսարանում այսօր հանդիպել է դասախոսների և ուսանողների հետ։
Խոսելով երիտասարդ լինելու կարևորության և առավելությունների մասին՝ նախագահ Սարգսյանը ասել է, թե մարդիկ սկսում են ծերանալ այն ժամանակ, երբ դադարում են սովորել, դադարում են ուրախանալ նոր բացահայտումներով և դադարում են հայտնաբերել ու հայտնագործել:
«Ի՞նչ է նշանակում լինել երիտասարդ: Կարծում եմ՝ այստեղ խնդիրը տարիների քանակը չէ: Վստահ եմ, ձեզնից յուրաքանչյուրը հանդիպել է մարդկանց, ովքեր 16 կամ 20 տարեկան են, բայց արդեն շատ տարեց են, հետաքրքրված ու ակտիվ չեն: Եվ միաժամանակ տեսել եք 60, 70 կամ 90 տարեկան մարդկանց, ովքեր լի են կյանքով: Երիտասարդության ցուցիչներից է ֆիզիկական ակտիվությունը: Որքան ավելի ակտիվ կյանքով ենք ապրում, այնքան ավելի երիտասարդ ենք:
Կարևոր է ամեն օր սովորել նոր բան:
Ժամանակը հարաբերական է և կախված է յուրաքանչյուրի արագությունից:
Մեր ձեռքերում է՝ լինել երիտասարդ ու ապրել լիարժեք կյանքով՝ անկախ տարիքից:
21-րդ դարը երիտասարդների ժամանակն է:
Ինչո՞ւ է կարևոր լինել երիտասարդ 21-րդ դարում:
21-րդ դարը տարբեր է լինելու: Ես ավարտում եմ իմ գիրքը, որը կոչվում է «Համաշխարհային ռիսկերի քվանտային վարքագիծը»: Սա չի նշանակում, որ մենք քվանտային ֆիզիկայի օրենքներն ենք կիրառելու այդ ամենը նկարագրելու համար: Սա ենթադրում է, որ իրադարձությունները, քաղաքականությունը չեն լինելու դասական ձևով: Աշխարհում այսօր տեղի ունեցող իրադարձությունները դրա ապացույցն են:
21-րդ դարը երիտասարդների ժամանակաշրջան է, 21-րդ դարը դուք կառավարելու եք ամբողջովին այլ կերպ, քան մենք ենք արել նախկինում: Հուսով եմ, որ բոլորդ կշարունակեք երիտասարդ մնալ»,-ասել է Արմեն Սարգսյանը:
«Հայաստանը տարածաշրջանում տեղեկատվական տեխնոլոգիաների ոլորտի առաջատար է:
Այս ամենը երկրի ուժն է, ուժը փոքր պետության, բայց համաշխարհային ազգի», եզրափակել է Արմեն Սարգսյանը։