ԵՐԵՎԱՆ, 27 նոյեմբերի – Sputnik. ՀՀ երկրորդ նախագահ Ռոբերտ Քոչարյանի կալանքի գործով դատական նիստը Վերաքննիչ դատարանում ընդմիջվեց մեկ ժամով։ Այս մասին լրագրողներին հայտնեցին դռնփակ նիստից դուրս եկած դատախազները։
Նրանք հաստատեցին լրագրողների այն տեղեկությունները, որ դատական նիստին մասնակցում է նաև ՀՀ գլխավոր դատախազ Արթուր Դավթյանը։
Քոչարյանի փաստաբան Հայկ Ալումյանը, դահլիճից դուրս գալով, նշեց, որ նոր ու հետաքրքիր հանգամանքներ են պարզվել գործի քննության ընթացքում, բայց առայժմ ձեռնպահ մնաց մեկնաբանություն անելուց` խոստանալով լրագրողների հետ խոսել նիստի ավարտին։
Հիշեցնենք, որ ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել է անձեռնմխելի և ազատել կալանքից:
Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին: