ԵՐԵՎԱՆ, 23 նոյեմբերի — Sputnik. Սփյուռքի նախարարի պաշտոնակատար Մխիթար Հայրապետյանն այսօր մամուլի ասուլիսի ժամանակ անդրադարձավ գերատեսչությունների կրճատման թեմային։
Ավելի վաղ առաջին փոխվարչապետի պաշտոնակատար Արարատ Միրզոյանն ասել էր, որ Հայաստանում նախարարությունների թիվը կկրճատվի, ու ներկայիս 17–ի փոխարեն դրանք կարող են լինել 9-11–ը։
Հայրապետյանի խոսքով` սփյուռքի նախարարության վերաբերյալ դեռ վերջնական որոշում չկա։ Վեց ամսվա աշխատանքի ընթացքում նա համոզվել է, որ նախորդ տարիների ընթացքում սփյուռքի նախարարությունը զուտ ձևական բնույթ է կրել։
«Եթե նախարարությունը պետք է լինի ձևական, առանց հստակ հարցերի լուծման, ապա ավելի լավ է այն պարզապես վարչություն լինի», – ասաց նա։
Սփյուռքի հետ աշխատանքը պետք է փոխշահավետ լինի։
Սփյուռքի հետ հարաբերությունների փաստաթուղթը մշակվել է սփյուռքի լավագույն մասնագետների հետ միասին։ Անդրադառնալով իր հետագա պաշտոնավարմանը` Հայրապետյանը կոչ արեց սպասել ընտրությունների արդյունքին։
Նա պատրաստ է աշխատել ինչպես խորհրդարանում, այնպես էլ կառավարությունում։ Իսկ վաղվանից Հայրապետյանը մասնակցելու է նախընտրական քարոզարշավին։ Այսօր նախարարի պաշտոնակատարի պաշտոնում նրա վերջին աշխատանքային օրն է։ Հայրապետյանը արձակուրդ է վերցրել` քարոզարշավով զբաղվելու համար։