ԵՐԵՎԱՆ, 23 նոյեմբերի — Sputnik. Քարոզչության համար ժամկետի սահմանված լինելը չի սահմանափակում օրենսգրքով չարգելված այլ ժամանակահատվածում քարոզչության իրականացումը։ Այս մասին նշված է ՀՀ կենտրոնական ընտրական հանձնաժողովի տարածած հայտարարությունում։ Ըստ ԿԸՀ–ի` քարոզչության պաշտոնական մեկնարկից առաջ քարոզչություն իրականացնելն իրավաչափ է և Ընտրական օրենսգրքի որևէ խախտում չէ։
«Նախընտրական քարոզչության ժամանակահատվածը օրենքով սահմանված այն ժամանակահատվածն է, որի ընթացքում ընտրություններին մասնակցող կուսակցություններին, թեկնածուներին հավասար հնարավորություններ ապահովելու նպատակով գործում են հանրային ռեսուրսներից օգտվելու, քարոզչություն իրականացնելու և ֆինանսական թափանցիկությունն ապահովելու` սույն օրենսգրքով սահմանված կանոնները»,– նշում է հանձնաժողովը` վկայակոչելով ՀՀ ընտրական օրենսգրքի 19-րդ հոդվածի 1-ին մասի 1-3-րդ պարբերությունները:
Ազգային ժողովի արտահերթ ընտրության քարոզարշավի համար ԿԸՀ–ն սահմանել է նոյեմբերի 26-ից դեկտեմբերի 7-ը:
«Հենց սա է այն ժամանակահատվածը, որի ընթացքում ընտրություններին մասնակցող կուսակցություններին, թեկնածուներին հավասար հնարավորություններ ապահովելու նպատակով գործում են հանրային ռեսուրսներից օգտվելու, քարոզչություն իրականացնելու և ֆինանսական թափանցիկությունն ապահովելու` օրենսգրքով սահմանված կանոնները»,–հայտնում է ԿԸՀ–ն:
ՀՀ վարչապետի պաշտոնակատար Նիկոլ Փաշինյանն այսօր լրագրողների հետ զրույցում անդրադարձել էր ՀՀԿ–ի մեղադրանքներին` պաշտոնեական լիազորությունները չարաշահելու և նախընտրական քարոզչությունը սահմանված ժամանակից շուտ սկսելու մասին հարցին` ասելով, որ ինքն օրենք չի խախտում և ՀՀ ցանկացած քաղաքացի իրավունք ունի երթ անցկացնելու։