ԵՐԵՎԱՆ, 22 նոյեմբերի — Sputnik. ՀՀ մշակույթի նախարարի պաշտոնակատար Լիլիթ Մակունցը հերքում է լուրերն այն մասին, որ տարաձայնություններ ունի Ալեքսանդր Սպենդիարյանի անվան օպերայի և բալետի ազգային ակադեմիական թատրոնի գլխավոր տնօրեն և գեղարվեստական ղեկավար Կոնստանտին Օրբելյանի հետ։ Այս մասին այսօր հրավիրված ասուլիսին ասաց նա` պատասխանելով Sputnik Արմենիայի թղթակցի հարցին։
Մակունցին մշակույթի նախարարի պաշտոնում նշանակելուց անմիջապես հետո սկսեցին լուրեր տարածվել, որ նա մտադիր է փոխել օպերայի և բալետի ազգային ակադեմիական թատրոնի գլխավոր տնօրենին։ Օրբելյանի զբաղեցրած երեք պաշտոններից (թատրոնի գեղարվեստական ղեկավար, տնօրեն, դիրիժոր) միայն մեկը ընտրելու և այդ պաշտոնին մնալու անհրաժեշտության մասին նրա հայտարարություններից հետո փորձագետներից շատերը կանխատեսում էին, որ Օրբելյանը շուտով հրաժարական կտա։
«Մենք հետագա աշխատանքներում, բեմադրություններում ստեղծագործական անձնակազմին լայնորեն ներգրավելու հետ կապված քննարկումներ ենք ունեցել», – ասաց Մակունցը։
Մակունցի խոսքով` երբ Օրբելյանը վերադարձել է արձակուրդից հանդիպում է տեղի ունեցել, որի ժամանակ էլ հենց որոշվել է, թե որ ուղղությամբ պետք է զարգանա թատրոնը։
Ավելի վաղ Sputnik Արմենիայի հետ զրույցում Օրբելյանը նույնպես հերքել էր նախարարի հետ իր տարաձայնությունների մասին լուրերը։ Նա նաև հայտարարել էր, որ մշտապես կապի մեջ է Մակունցի հետ, և նրանք միասին փորձում են լուծել առկա խնդիրները։