ԵՐԵՎԱՆ, 22 նոյեմբերի — Sputnik. Հայաստանը 23 միլիոն 208 հազար 483 եվրո դրամաշնորհ կստանա Վերականգնման վարկերի բանկից։ Համաձայնագիրը հաստատվեց կառավարության այսօրվա նիստում։
Այդ գումարով սոցիալ–տնտեսական ծրագրեր կիրականացվեն Հայաստանի անտառամերձ գյուղերում (հիմնականում` Լոռիում, Տավուշում ու Սյունիքում)։
«Գյուղացիներին հնարավորություն կտանք գումար վաստակել ոչ թե անտառ հատելով, այլ ուրիշ կերպ։ Նույնիսկ եթե անտառի շուրջը երեք մետրանոց պատ կառուցենք ու պահակներ դնենք, միևնույնն է` հարցը չի լուծվում` մարդիկ ինչո՞վ ապրեն։ Այդ պատճառով ծրագրի շրջանակում ուզում ենք չիր պատրաստելու սարքեր, գյուղատնտեսական տեխնիկա գնել, աջակցել էկոլոգիական զբոսաշրջության զարգացման ծրագրերին», – ասաց բնապահպանության նախարարի պաշտոնակատար Էրիկ Գրիգորյանը։
Նրա խոսքով` քննարկվում է նաև գյուղական դպրոցներում արևային մարտկոցների ու ջրատաքացուցիչների տեղադրման հարցը, ինչը կարող է թույլ տալ ձմռանը չօգտվել գազից ու հատկապես փայտից։
ՀՀ վարչապետի պաշտոնակատար Նիկոլ Փաշինյանն էլ ավելացրեց, որ առաջին հերթին մարդկանց հետ պետք է ազնիվ ու անկեղծ երկխոսություն վարել։
«Եթե, օրինակ, միջոցներ է ձեռնարկում, որ սիգի որսը ձվադրման սեզոնում սահմանափակվի կամ անտառների պաշտպանվածության մակարդակը բարձրանա, ում համար ենք անում, մե՞նք ենք գնալու որսանք, նույն տարածաշրջանի մարդիկ են որսալու: Ինչ-որ արվում է, առաջնահերթ այդ տարածաշրջանում ապրող մարդկանց շահերից է ելնում, մենք ուղիղ պետք է նայենք մեր հայրենակիցներին և երկխոսենք, որ այդ ընկալումն ունենան»,-ասաց նա` կարևորելով դրամաշնորհային ծրագրերը:
Փաշինյանը նշեց, որ պետք է մարդկանց ցույց տալ, որ անտառ չկտրելով ավելի շատ կարող են օգուտ ստանալ, քան կտրելով: Նա հայտնեց, որ 55 հազար խորանարդ մետր վառելափայտ է տրամադրվել՝ առանց անտառները վնասելու:
Հիմա Հայաստանի տարածքի մոտ մեկ քառորդն է անտառներով պատված։ Չոր կլիմայի պատճառով անտառները դանդաղ են վերականգնվում։