ԵՐԵՎԱՆ, 18 նոյեմբերի –Sputnik, Աշոտ Սաֆարյան. ՀՀ վարչապետի պաշտոնակատար Նիկոլ Փաշինյանը և նրա ներկայացրած քաղաքական ուժը առաջիկա ընտրական գործընթացներում որևէ լուրջ դիմադրության չեն հանդիպի։ Sputnik Արմենիայի հետ զրույցում նման կարծիք հայտնեց քաղաքագետ Մանվել Սարգսյանը։
«Որևէ հակամիջոց, որևէ ռևանշ չի լինելու։ Ժամանակը ցույց տվեց, որ հակահեղափոխության, ռևանշիստական տրամադրությունների մասին խոսակցությունները զուտ խոսակցություններ են։ Չեմ կարծում, որ կան ուժեր, որոնք կցանկանան և ի վիճակի կլինեն որևէ կերպ խարխլել իրավիճակը», – նշեց Սարգսյանը։
Փորձագետը քննադատեց ՀՀԿ–ի համամասնական ցուցակը` նշելով, որ ցուցակը չի համապատասխանում «ռեբրենդինգի» ու ընդդիմություն դառնալու «տրանսֆորմացիայի» տրամաբանությանը, ինչի մասին բազմիցս խոսել են հանրապետականները։
«Ակնհայտ է, որ Հանրապետական կուսակցությունը դադարել է գոյություն ունենալ։ Խոշոր սեփականատերերը վաղուց հեռացել են կուսակցությունից` զրկելով նրան լուրջ ֆինանսական ռեսուրսներից։ Հասկանալի չէ, թե նման պայմաններում ինչի վրա են նրանք հույս դնում», – ասում է մեր զրուցակիցը։
Նա գրեթե համոզված է, որ եթե ՀՀԿ–ն ԱԺ չանցնի, ապա երկու օր անց Մելիք–Ադամյանի իրենց գրասենյակում հազիվ թե հնարավոր լինի 5 հոգի հավաքել։ ՀՀԿ–ին միակ կապող գործոնն այժմ մի քանի մանդատ ստանալու ձգտումն է։
ՀՀԿ–ն հիմնականում հույսը դնում է օրենքի ուժով խորհրդարան անցնելու վրա, քանի որ հազիվ թե նրանք կարողանան հաղթահարել կուսակցության համար պահանջվող 5%–անոց շեմը։ Գործող Ընտրական օրենսգիրքը խորհրդարանում առնվազն 4 ուժի առկայություն է պահանջում։ Եվ եթե ՀՀԿ–ն չկարողանա հաղթահարել 5%–ի շեմը, ապա նա կարող է խորհրդարան անցնել օրենքի պահանջով։
Սարգսյանը դժվարացավ ասել, թե արդյոք խորհրդարան կանցնեն «Ելք» դաշինքից Փաշինյանի նախկին համախոհները։ Խոսքը «Լուսավոր Հայաստանի» և «Հանրապետության» մասին է։ Նրանց ճանապարհներն այս ընտրություններում բաժանվեցին, ինչը փորձագետի կարծիքով, կհանգեցնի միայն ընտրազանգվածի մասնատմանն ու փոշիացմանը։
Նիկոլ Փաշինյանի «Իմ քայլը» դաշինքի համամասնական ցուցակը Սարգսյանը տարատեսակ մարդկանց ցուցակ է համարում։
«Հասկանալի է, որ ցուցակը կազմվել է «թավշյա հեղափոխության» ալիքի վրա։ Այն մարդկանց ցանկ է, որոնց շարքում կան ինչպես բավական պատրաստված կադրեր, այնպես էլ բացարձակ պատահական դեմքեր», – ավելացրեց նա։
Հիշեցնենք, որ Ազգային ժողովի դեկտեմբերի 9-ին կայանալիք արտահերթ ընտրություններին 11 քաղաքական ուժ կմասնակցի` «Իմ քայլը» դաշինքը, «Բարգավաճ Հայաստան» կուսակցությունը, ՀՅԴ-ն, «Լուսավոր Հայաստան» կուսակցությունը, ՀՀԿ-ն, «Մենք» դաշինքը, «Ազգային առաջընթաց» կուսակցությունը, «Քրիստոնյա-ժողովրդական վերածնունդ» կուսակցությունը, «Սասնա ծռեր» կուսակցությունը, «Օրինաց երկիր» կուսակցությունը, «Քաղաքացու որոշում» սոցիալ-դեմոկրատական կուսակցությունը: Նախընտրական արշավը կմեկնարկի նոյեմբերի 26-ին։