ԵՐԵՎԱՆ, 12 նոյեմբերի — Sputnik. Ուժեղ ու ազատ Արցախ և ուժեղ ու առաքելական Հայաստան, ոչ թե Հայաստան, որտեղ կա պղծության ու համասեռամոլության քարոզ և աղանդավորներն էլ վխտում են։
Այսօր լրագրողների հետ զրույցում, ներկայացնելով առաջիկա արտահերթ խորհրդարանական ընտրություններին մասնակցելու ՀՀԿ հիմնական շարժառիթը, ասաց ՀՀԿ խոսնակ, ԱԺ փոխնախագահ Էդուարդ Շարմազանովը։
«Կա երկու բևեռ` մի մեծ բևեռ, որին վստահում է ՀՀ քաղաքացիների ճնշող մեծամասնությունը, այդ բևեռը պայմանական կոչենք` Փաշինյան և կոմպանիա։ Այդ կամպանիայի մեջ մտնում եմ բոլորը, բացի Հանրապետականից` նրանք, որոնք ողջունել են հեղափոխությունը։ Եվ կա մի փոքր բևեռ` Շարմազանով, Աշոտյան, Սարգսյան, Արփինե Հովհաննիսյան, Վահրամ Բաղդասարյան և կամպանիա»,– ասաց Շարմազանովը` հավելելով, որ ՀՀԿ–ն ընտրությունների է գնում ընդդիմություն լինելու համար։
«Պայքարը գնում է այդ իշխանությանը ժողովրդավարական այլընտրանք լինելու համար»,– ասաց նա։
Իսկ կես դրույքով ընդդիմություն, նրա համոզմամբ, չի կարող լինել, ուստի թավշյա հեղափոխությունը ողջունած ու Փաշինյանին աջակցություն հայտնած քաղաքական ուժերի ընդդիմություն լինելուն Շարմազանովը չի հավատում։