ԵՐԵՎԱՆ, 12 նոյեմբերի — Sputnik, Դավիթ Գալստյան. «Տարոն-Ավիա» ավիաընկերությունը փաստաթղթներն ուղարկել է Հայաստանի Տնտեսական մրցակցության պաշտպանության պետական հանձնաժողով (ՏՄՊՊՀ)՝ կապված ռուսական օդանավակայաններում անհավասար պայմաններ տրամադրելու հետ։
Այդ տեղեկությունը Sputnik Արմենիային հաստատեցին ՏՄՊՊՀ-ից։
Ավելի վաղ Երևանում «Եվրասիական շաբաթ» համաժողովի շրջանակում «Տարոն-Ավիայի» կոմերցիոն տնօրեն Լևոն Քարամյանը բարձրացրել է ռուսական օդանավակայանների կողմից հայկական ընկերությունների հանդեպ կիրառվող խտրականության հարցը։
«Մեզ տրամադրվել են փաստաթղթերը։ Մենք մեր հերթին պատրաստում ենք փաստաթղթերը Եվրասիական տնտեսական հանձնաժողով ուղարկելու համար», - հաղորդեցին ՏՄՊՊՀ մամուլի ծառայությունից։
ԵՏՀ-ից Sputnik Արմենիային հաղորդեցին, որ ծանոթ են «Տարոն-Ավիայի» բարձրացրած խնդրին և սպասում են պաշտոնական դիմումի։
Ավելի վաղ «Տարոն-Ավիա» ընկերությունից հաղորդել են Sputnik Արմենիային, որ ԵՏՀ ներկայացուցիչների հետ հանդիպման շրջանակում նրանց առաջարկել են երկու տարբերակ. կամ դիմել ԵՏՀ, կամ Հայաստանի ՏՄՊՊՀ։
Նշենք, որ «Տարոն-Ավիայի» տեղեկությունների համաձայն, Ռուսաստանի օդանավակայանները հայկական ընկերություններին ավելի թանկ գներով են սպասարկում, քան տեղի ընկերություններին, ինչը ԵԱՏՄ կանոնների խախտում է, իսկ Հայաստանում բաց երկնքի քաղաքականության շրջանակում բոլոր ավիաընկերություններին հավասար պայմաններ են առաջարկվում։
Sputnik Արմենիան կհետևի խնդրի շուրջ հետագա զարգացումներին։