ԵՐԵՎԱՆ, 10 նոյեմբերի – Sputnik. Աշխաբադում անցկացված աշխարհի առաջնության վերջին օրը գերծանր քաշային կարգում, երկամարտի 450կգ արդյունքով աշխարհի փոխչեմպիոն դարձավ ծանրորդ Գոռ Մինասյանը:
Ծանրամարտի աշխարհի առաջնությունը, ինչպես միշտ, եզրափակում էին գերծանր քաշային կարգի ծանրորդները: Ոչ ոք չէր կասկածում, որ հաղթողի հիմնական հավակնորդը լինելու է վրացի Լաշա Տալախաձեն. այս ծանրորդի հետ պարզապես հնարավոր չէ հավասար մրցել: Օլիմպիական խաղերի չեմպիոնը, մեղմ ասած, շատ ուժեղ է մյուսներից: Բայց սպորտում ամեն ինչ պատահում է, ու նրա հետ պայքարող մարզիկների շարքը գլխավորում էր մեր Գոռ Մինասյանը:
Գյումրեցի ծանրորդը պոկում վարժությունում հստակ կատարելով երկու մոտեցում` ապահովեց արծաթե փոքր մեդալը` ցույց տալով 205 կգ արդյունք: Իսկ Տալախաձեն աշխարհի ռեկորդով հաղթեց այս վարժությունում 217 կգ արդյունքով: Պարզ էր, որ հայ ծանրորդը երկամարտում հիմնականում պայքարելու է արծաթե մեդալի համար: Ու ընդ որում մասնակիցների մեծամասնությունը հրում վարժությունում ավելի ուժեղ էին, քան պոկումում:
Բայց մրցակիցների բոլոր փորձերը` ուղղված Գոռ Մինասյանին երկրորդ տեղի համար պայքարում շրջանցելուն, անհաջողության մատնվեցին, ու հայ ծանրորդը դարձավ աշխարհի առաջնության արծաթե մեդալակիր` երկամարտի 450 կգ արդյունքով, միաժամանակ արծաթե մեդալներ նվաճելով նաև առանձին վարժություններում:
Այսպիսով` Հայաստանի հավաքականը Աշխաբադում նվաճեց երկու ոսկե և հինգ արծաթե մեդալ: