Ռուս գեղասահորդուհի Ալինա Զագիտովան Կարմենի կերպարում ոսկի է նվաճել Ֆինլանդիայում անցկացվող Գրան պրի մրցաշարի ժամանակ։ Երկրորդ տեղում ևս Ռուսաստանի ներկայացուցիչ` Ստանիսլավա Կոնստանտինովան է։ Ռուս գեղասահորդներն, ընդհանուր առմամբ, հինգ մրցանակ են նվաճել. 3 ոսկի, 1 արծաթ և 1 բրոնզե մեդալ։
Զագիտովայի համեմատաբար մաքուր սահքն ազատ ծրագրում վերականգնեց նրա սխալները կարճ ծրագրում, և գեղասահորդուհին մեծ տարբերությամբ հաղթանակ տարավ կանանց մրցումներում։ Կարճ և ազատ ծրագրերի արդյունքում Զագիտովան 215,29 միավոր վաստակեց` գերազանցելով հայրենակցուհուց մոտ 18 միավորով։
Հայտնի մարզիչ Տատյանա Տարասովան «Սպորտ 24»–ին տված հարցազրույցում գովասանքի խոսքեր ասաց Էթերի Թութբերիձեի սանի հասցեին։
«Մեր հավաքականում ասում են. Ալինկային արթնացրու գիշերը, բեր մեկ այլ քաղաք, նա կհագնի չմուշկները և կսկսի ցատկել, ցատկել, ցատկել և ամեն ինչ կհաղթահարի», – ասել է Տարասովան։
16-ամյա Ալինա Զագիտովան Փհենչհանի ձմեռային Օլիմպիական խաղերի հերոս դարձավ` ոսկի նվաճելով կանանց մենասահքում։ 2018 թվականն Ալինա Զագիտովայի համար ամենահաջողակ տարին էր, նա արդեն երկրորդ տարին էր հանդես գալիս մեծահասակների մրցումներում։ 2017 թվականին նա հաղթանակ տարավ Ռուսաստանի և Եվրոպայի առաջնություններում։ Իսկ 2016 թվականին նա Գրան պրի նվաճեց պատանիների միջև անցկացվող մրցաշարում։