Նոյեմբերի 2-ին Yerevan Food Fest խոհարարական փառատոնի շրջանակում մատուցվեց ընթրիք, որը պատրաստել էին Sherep ռեստորանի շեֆ խոհարար Գարիկ Խաչատրյանն ու հոլանդացի հայտնի խոհարար, Միշլենի աստղ ստացած Էդվին Սոմանգը (Edwin Soumang)։
Էդվինի և Գարիկի կազմած ճաշացանկում ներառվել էին համեղ խորտիկներ, տաք ճաշատեսակներ և աղանդերներ։ Մթերքները գնել էին Երևանում՝ տեղի շուկաներից մեկում։ Երկու խոհարարները պատրաստած նրբաճաշակ ուտեստները գնահատում էին հայտնի ռեստորատորները, ֆուդ բլոգերները և փառատոնի հյուրերը։
«Հայաստանը մարտահրավեր է նետել, և դա հիանալի է։ Հեշտ է աշխատել, քանի որ կոլեկտիվը շատ ջերմ ընդունեց ինձ», - ասաց Էդվինը Sputnik Արմենիայի թղթակցի հետ զրույցում։
Նա նշեց, որ իր հայ գործընկեր Գարիկը և ռեստորանի թիմը ահռելի աշխատանք են կատարել։ Հոլանդացի խոհարարի կարծիքով՝ընթրիքն իսկական մարտահրավեր է դարձել խոհարարների համար, բայց նրանք իրենց գործը հաջողությամբ են կատարել պրոֆեսիոնալիզմի շնորհիվ։
«Սա լուրջ մարտահրավեր է ինձ համար, ցանկացած խոհարարի համար նույնպես։ Կարճ ժամանակում մենք պետք է ծանոթանայինք ազգային խոհանոցի առանձնահատկություններին, տեխնիկային, մթերքներին և այնպիսի բան ստեղծեինք, որը մինչև հիմա չի եղել», - ասաց Էդվինը։
Նրա հետ համակարծիք էր Խաչատրյանը։ Sputnik Արմենիայի թղթակցի հետ զրույցում նա նշեց, որ դա հիանալի փորձ է եղել թե՛ իր, թե՛ Էդվինի համար։ Հիմա երկուսն էլ այլ կերպ կնայեն պատրաստման որոշ նրբություններին, ինչպես նաև կօգտագործեն ձեռք բերած փորձը։
Ռեստորանի ավանդույթի համաձայն` երկու շեֆ խոհարարներն էլ վերջում փոխանակեցին շերեփները։ Մանրամասները դիտեք տեսանյութում։
Sputnik Արմենիա գործակալությունը փառատոնի տեղեկատվական հովանավորն է։