ԵՐԵՎԱՆ, 2 նոյեմբերի — Sputnik. «Երևան ֆուդ ֆեստի» հյուրերը զարմացած են Հայաստանի կոլորիտով, ռեստորաններով և գաստրոնոմիական առանձնահատկություններով։
Այդ մասին Sputnik Արմենիայի թղթակցի հետ զրույցում ասաց «Երևան ֆուդ ֆեստի» ղեկավար Աննա Մազմանյանը։
Հինգշաբթի Երևանում բացվեց «Երևան ֆուդ ֆեստ» երկրորդ գաստրոնոմիական տոնը։ Փառատոնի ծրագրում ներառված են դասախոսություններ խոհարարության և զբոսաշրջության մասին, վարպետության դասեր, ֆիլմերի ցուցադրություններ, ընթրիքներ։ Փառատոնը կտևի մինչև նոյեմբերի 6-ը։ «Նրանք չեն պատկերացրել, որ մենք այսպիսի մակարդակի հաստատություններ, մթերք, գինի, պրոֆեսիոնալ խոհարարներ ունենք», - ասաց Մազմանյանը։
Նրա խոսքով՝ փառատոնի նպատակն է ներկայացնել Հայաստանը հենց գաստրոնոմիական առանձնահատկությունների առումով, ցույց տալ Երևանը որպես գաստրոնոմիական մայրաքաղաք, ծանոթությունների և շփման հարթակ դարձնել։
«Փառատոնը նպաստում է զբոսաշրջիկների հոսքին և, որպես կանոն, նոր աշխատատեղերի ստեղծմանը», - նշեց նա։
Հիշեցնենք, որ փառատոնը նման ձևաչափով Երևանում տեղի կունենա երկրորդ անգամ։ Զվարճացնող մասից բացի կլինի նաև ճանաչողական ծրագիր։
Տարբեր մասնագիտությունների ներկայացուցիչները՝ սկսած լրագրողներից, վերջացրած ճարտարապետներով և խոհարարներով, կարող են շատ բան սովորել երկրում զբոսաշրջությունը զարգացնելու համար։
Բայց, իհարկե, ավելի շատ գուրմանների բախտը կբերի, քանի որ մի քանի ռեստորաններում տեղի կունենան ընթրիքներ՝ միշլենյան և հայ խոհարարների մասնակցությամբ։ Ընդ որում` կօգտագործվեն մթերքներ Կոտայքից, Արմավիրից և Տավուշից։
Հայաստանում տեղի կունենան բազմաթիվ փառատոններ՝ գինու, ձմերուկի, խորովածի, տոլմայի, ղափամայի, գարեջրի, գինու և նույնիսկ ազգային տարազի։ Ոլորտի փորձագետները կարծում են, որ նրանք բարձրացնում են երկրի գրավչությունը։ Այդ թվում նաև այդ պատճառով 2017թ-ին Հայաստան է այցելել մոտ 15 միլիոն զբոսաշրջիկ, ինչը 18,7 տոկոսով ավելի է, քան 2016թ-ին։ Այս տարվա առաջին կիսամյակում այդ ցուցանիշն աճել է ևս 10,2 տոկոսով։
Sputnik Արմենիա գործակալությունը փառատոնի ինֆորմացիոն հովանավորն է։