ԵՐԵՎԱՆ, 2 նոյեմբերի — Sputnik. Հայաստանը թեկնածուներ ունի ՀԱՊԿ գլխավոր քարտուղարի պաշտոնում։
Այդ մասին ուրբաթ լրագրողներին ասաց Հայաստանի ԱԳՆ ղեկավարի պաշտոնակատար Զոհրաբ Մնացականյանը։
Նոյեմբերի 2–ին ՀԱՊԿ հավաքական անվտանգության խորհրդի որոշմամբ Խաչատուրովն ազատ է արձակվել կազմակերպության գլխավոր քարտուղարի պաշտոնից։
«Հաջորդ շաբաթ կլինի հավաքական անվտանգության խորհրդի նիստը, ՀԱՊԿ ԱԳՆ ղեկավարների նիստը։ Վեց երկրների մշտական ներկայացուցիչները շարունակում են քննարկումները, պատրաստում հանդիպումներ տարբեր մակարդակներում», – հաղորդեց Մնացականյանը։
Նա նշեց, որ ՀԱՊԿ գլխավոր քարտուղարի պաշտոնում Հայաստանի ներկայացուցչին նշանակելու հարցը դրված է հանրապետության իշխանությունների օրակարգում։
Նրա խոսքով, եթե հայկական կողմը որոշի առաջադրել իր թեկնածուին, ապա կադրերի հետ խնդիր չի լինի։
Միաժամանակ, եթե առաջարկվի այլ թեկնածու, ապա Հայաստանը կդիտարկի այդ պաշտոնում նրա արդյունավետության հարցը, հավելեց Մնացականյանը։
Նշենք, որ ավելի վաղ հայկական ԶԼՄ–ներում որպես ՀԱՊԿ գլխավոր քարտուղարի պաշտոնում առավել հավանական թեկնածու նշվել է Հայաստանի պաշտպանության նախկին նախարար Վաղարշակ Հարությունյանի անունը։ Սակայն Հարությունյանը հրաժարվեց մեկնաբանել այդ տեղեկությունը։