ԵՐԵՎԱՆ, 1 նոյեմբերի — Sputnik. Տավուշի մարզի 45 համայնքների բնակիչները հնարավորություն են ստացել կյանքի կոչել իրենց բիզնես գաղափարները ՄԱԿ–ի զարգացման ծրագրի և, մասնավորապես, «Գյուղական շրջանների զարգացման համալիր աջակցություն. կայուն համայնքների ստեղծում» նախաձեռնության շնորհիվ։ Հիմա գյուղացիները կարող են սեփական արտադրությունը սկսել` ներդնելով անհրաժեշտ գումարի ընդամենը 20 տոկոսը։
«Ծրագրի իրագործման համար հատկացվել է հինգ միլիոն դոլար։ Այն լիովին ֆինանսավորվում է Ռուսաստանի Դաշնության կողմից։ Արդեն 35 համայնքների բնակիչներ ներառվել են ծրագրի մեջ, մինչև տարեվերջ ծրագրում են գործարկել նախագիծը բոլոր 45 համայնքներում։ Մենք բաց ենք բոլորի հետ աշխատանքի համար։ Մեր համար կարևոր են մարդիկ, որոնք մնում են մարզերում և զարգացնում են դրանք», – ընդգծեց ծրագրի ղեկավար Արմեն Տիրատուրյանը։
Ծրագրի շրջանակում նախատեսվում է ստեղծել ոչ միայն փոքր ձեռնարկություններ և ֆերմերային տնտեսություններ, այլ նաև ջերմոցներ, գինեգործարաններ, չրի արտադրամասեր։ Մի խումբ գյուղեր կարող են գյուղատնտեսական տեխնիկա ստանալ, ինչպես նաև կետեր` իրենց արտադրանքը պահելու համար։
Ծրագրի երրորդ կարևոր բաղադրիչը ենթակառուցվածքների զարգացումն է։ Ծրագիրն օգնում է ներմուծել կաթիլային ոռոգման համակարգ, փողոցների լուսադիոդային լուսավորություն, պատմեց Տիրատուրյանը։
Տավուշի մարզի Դիտավան գյուղի բնակիչները որոշել են օգտվել ծրագրի հնարավորություններից և եգիպտացորենի դաշտերի փոխարեն պտղատու այգիներ են տնկել։
Համայնքի ղեկավար Հակոբ Սարիբեկյանը պատմեց, որ գյուղի բնակիչները տնկել են ընկուզենիներ, արքայանարնջի, հոնի, թզի և այլ պտղատու ծառեր։ Մերձարևադարձային կլիմայի շնորհիվ բնակիչները առատ բերք են ակնկալում և հույս ունեն, որ ոչ միայն կվերամշակեն այն Հայաստանում, այլ նաև կարտահանեն Ռուսաստան։
«Մի քանի գյուղացիներ միավորում են ջանքերը և ստեղծում այդ այգիները։ Դա ոչ միայն աշխատատեղ է և եկամուտ, այլ նաև երկրում զարգանալու, ապագան այստեղ տեսնելու և չարտագաղթելու բացառիկ հնարավորություն», – հայտարարեց Սարիբեկյանը։
Ծրագրի 22–ամյա շահառու Դավիթ Եգանյանը համաձայն է նրա հետ։ Բանակից հետո նա որոշել է մնալ հայրենի Սարիգյուղում և հիմնել սեփական ձեռնարկությունը։ Նա հացի փուռ է բացել և հացաբուլկեղեն է առաքում Սարիգյուղի բնակիչներին և հարակից ևս մի քանի գյուղերի։ Դավիթը վստահ է, որ ցանկության և աշխատասիրության դեպքում կարելի է հաջողության հասնել նույնիսկ հեռավոր համայնքներում` քիչ ռեսուրսներով։
«Կարևոր է հավաքել սեփական ուժերին և գտնել մարդկանց, որոնք պատրաստ են օգնել։ Հիմա մենք ընդլայնում ենք բիզնեսը և, հուսով եմ, շուտով երկու աշխատատեղի փոխարեն մենք տասնյակ աշխատակիցներ կունենանք», – ասաց երիտասարդ գործարարը։
Հարևան Աչաջուրի բնակիչ Արթուրն աշխատել է Ղարաբաղում, բայց ծրագրի շնորհիվ վերադարձել է հայրենի գյուղ և հիմա օգնում է համագյուղացիներին հավաքել ցորենի բերքը։ Բանն այն է, որ վերջերս նրանք նոր կոմբայն են գնել։ Նախկինում նրանք ստիպված էին սպասել, մինչև հարևան գյուղերում կավարտվի բերքահավաքը, և հերթը կհասնի իրենց։ Հիմա հասցնում են ամեն ինչ անել մյուսներից շուտ և իրացնել ապրանքն ավելի մատչելի գնով։ Անհրաժեշտության դեպքում օգնում են նաև հարակից գյուղերին։
Ռուսաստանի ԱԳՆ միջազգային կազմակերպությունների բաժնի փոխտնօրեն Սերգեյ Կոնոնուչենկոն բոլոր ձեռնարկությունները և այգիները դիտելուց հետո նշեց, որ տպավորված է այդ գյուղերում աշխատանքի կազմակերպմամբ։ Նրա խոսքով` մոտ հինգ տարի առաջ քննարկվել են նախագծերը, որոնք պետք է իրագործվեին Հայաստանում, և հիմա երևում են կոնկրետ արդյունքներ։
«Մենք մտադիր ենք հետագայում ևս զարգացնել ՄԱԿ զարգացման ծրագրի հետ համագործակցությունը Հայաստանում նախագծեր իրագործելիս, որոնք վերաբերում են Հայաստանի տնտեսության տարբեր ոլորտներին և կենսագործունեությանը, գյուղական շրջանների և զբոսաշրջության զարգացմանը, Հայաստանի անտառներում հրդեհների դեմ պայքարին», – նշեց նա։
Կոնոնուչենկոն հավատում է, որ Հայաստանի բնակչությունը դրական է վերաբերվում այդ նախագծերի իրագործմանը։ Նա վստահ է, որ դա կարևոր ավանդ է երկրների միջև համագործակցությունն ամրապնդելու գործում։