ԵՐԵՎԱՆ, 28 Հոկտեմբեր — Sputnik. Հետաքրքիր «ղալմաղալ» էր այսօր մեր կողքի շենքում. ոստիկանության մեքենաներ, ոստիկաններ, երկու մասի բաժանված «խալխ»` պոզիցիա-օպոզիցիա, այս երկու թևից «բեխաբար ճղճղացող» կանայք ու 5-֊րդ հարկում կախված լվացք։ Ֆեյսբուքի իր էջում գրել է թբիլիսաբնակ, հայալեզու «Վրաստան» թերթի լրագրող Գայանե Բոստանջյանը:
Ըստ նրա՝ տնային տնտեսուհիներից մեկը միամտություն է ունեցել լվանալ և դրսում կախել Վրաստանի նախագահի թեկնածուներից մեկի՝ քվեաթերթիկում նշված համարով պատկեր ունեցող շապիկ:
Մարդիկ դա դիտարկել են քարոզ ընտրության օրը, որն էլ առիթ է դարձել ոստիկանության խմբի գալուն ու վերածվել մեծ աղմուկի:
Այս աղմուկը չէր լինի, եթե «հինգ պարաններից ուղիղ բակ նայող առաջինի վրա չծածանվեր նախագահի թեկնածուներից մեկի համարով շապիկը»,-գրել է աղմուկի ականատեսը:
Հիշեցնենք, որ Վրաստանում արդեն ավարտվել է նախագահի ընտրության քվեարկությունը:
Ընտրատեղամասերի փակվելուց հետո հրապարակվել են էքզիթ փոլերի արդյունքները: «Եվրոպական Վրաստան» ընդդիմադիր կուսակցության անցկացրած հարցման արդյունքներով՝ թեկնածուներից ոչ մեկը չի հաղթահարել 50 տոկոս + 1 ձայների հարաբերակցության շեմը, ինչը նշանակում է, որ նախագահական ընտրությունների երկրորդ փուլ կկայանա ամենից շատ ձայներ հավաքած թեկնածուների մասնակցությամբ:
Իսկ ամերիկյան Edison Research ընկերության հարցման արդյունքներով, որն անցկացվել է «Ռուսթավի-2» հեռուստաալիքի պատվերով, ընտրություններում հաղթում է «Միասնական ազգային շարժում» կուսակցության թեկնածու Գրիգոլ Վաշաձեն, որը 40 տոկոս ձայն է ստացել:
Երկրորդ տեղում է հայտնվել անկախ թեկնածու Սալոմե Զուրաբիշվիլին, որը նույնպես մոտ 40 տոկոս ձայն է ստացել:
Մեկ այլ էքզիթ փոլի տվյալներով, որն անցկացրել է վրացական ընկերությունը «Վրացական երազանք» իշխող կուսակցության պատվերով, հաղթող է դարձել Սալոմե Զուրաբիշվիլին՝ ստանալով ընտրողների ձայների 52.3 տոկոսը:
Վրաստանում նախագահական ընտրությունների պաշտոնական տվյալներն ավելի ուշ կհրապարակի Կենտրոնական ընտրական հանձնաժողովը: