ԵՐԵՎԱՆ, 25 հոկտեմբերի — Sputnik. Արարատի մարզպետի կողմից Ուրցաձոր համայնքի ղեկավարի պաշտոնակատար նշանակված Գևորգ Ավետիսյանը մինչև երկուշաբթի չի կատարի իր պարտականությունները։ Այդպիսին է Ուրցաձոր գյուղի բնակիչների և տարածքային կառավարման նախարարի պաշտոնակատարի խորհրդական Արմեն Մարտիրոսյանի միջև պայմանավորվածության արդյունքը։ Նշենք, որ ուրցաձորցիները հինգշաբթի բողոքի ակցիա էին կազմակերպել Երևանում` կառավարության շենքի դիմաց։
«Ավետիսյանը մինչև երկուշաբթի հանդես չի գա որպես գյուղապետ։ Տարածքային կառավարման նախարարությունում կքննարկեն և կգնահատեն ամբողջ իրավիճակը և որոշում կկայացնեն, որը կբավարարի երկու կողմերին», – Sputnik Արմենիայի թղթակցին ասաց ուրցաձորցի ակտիվիստ Սերոբ Խաչատրյանը։
Ավելի վաղ Արարատի մարզի Ուրցաձոր համայնքի տասնյակ բնակիչներ «Մի անտեսեք մեզ» գրությամբ պաստառներով բողոքի ակցիա էին կազմակերպել կառավարության շենքի մոտ` պահանջելով գյուղապետի պաշտոնակատար Գևորգ Ավետիսյանի հրաժարականը։
Վերջերս Արարատի մարզպետը Ավետիսյանին նշանակել էր Ուրցաձորի գյուղապետի պաշտոնում՝ հրաժարական տված համայնքի անկուսակցական ղեկավար Ռաֆիկ Անդրեասյանի փոխարեն։ Հետագայում արտահերթ ընտրություններին մասնակցելու պատրաստակամությամբ ու վերընտրվելու համոզվածությամբ՝ Անդրեասյանը պաշտոնը թողել էր, երբ մի խումբ գյուղացիներ բողոքի ակցիաներ էին սկսել, դժգոհելով, թե Անդրեասյանը անկուսակցական է, բայց ՀՀԿ–ի կողմնակից է։
Գյուղի բնակչությունը կազմում է մոտ 1500 մարդ։