Լաուրա Սարգսյան, Sputnik Արմենիա
Եթե ուզում եք, որ ձեզ համար գուշակություն անեն սուրճի մրուրով կամ որոշել եք հասկանալ` որ տեսակի սուրճն եք նախընտրում, հետո էլ պարզել` թեյի քանի տեսակ կարելի է փորձել Երևանում, այդ դեպքում շտապեք «Կարապի լճի» մոտ։
Արդեն երկրորդ տարին անցկացվող փառատոնը Երևանում բացվել է ուրբաթ և կտևի մինչև հոկտեմբերի 20–ը։ Դրան մասնակցում են տարբեր ընկերություններ, որոնք ներկայացնում են թեյի, սուրճի արտադրանքը, կերամիկական ամանեղեն, սրճեփներ։ Գործում են 42 տաղավարներ։
«Մի անհանգստացիր, քեզ մոտ ամեն ինչ կստացվի։ Դու ընդհանրապես սխալ մարդու համար ես անհանգստանում», – տաղավարի մոտ հերթ կանգնած աղջիկներից մեկին ասում է փորձառու գուշակ Արմինեն` նայելով բաժակում մնացած սուրճի մրուրին։
Արմինեն սուրճի բաժակ է նայում 14 տարեկանից և համոզված է, որ դա շնորհ է, որով նրան օժտել է բարձրյալը։ 11 տարեկանում նա տեսիլք է ունեցել. երազում տեսել է մի մարդու, որն ասել է` նա պետք է ստեղծի իր անկյունը, որտեղ կարող է օգնել մարդկանց։
«Չի ստացվել առանձին անկյուն բացել, բայց գուշակությամբ զբաղվում եմ 14 տարեկանից։ Հասկանում եք, մարդկանց կյանքից տարբեր իրավիճակները դառնում են մի մեծ նկար` փազլ», – ասաց Արմինեն։
Նրան նույնիսկ չէր խանգարում, որ բաժակը պլաստմասսայից էր, հակառակը, մեծ բաժակով գուշակությունն անելն ավելի հեշտ է, ասաց նա և շարունակեց տնտղել կանանց ու աղջիկների ճակատագրերը, որոնք ուզում էին իմանալ իրենց ապագան։
Մինչ Արմինեն գուշակում էր, ռուսաստանցի զբոսաշրջիկները սրճեփ էին ընտրում։ Նրանք առաջին անգամ էին Հայաստանում։
«Հիանալի քաղաք է, երկիր, ձեր գեղեցիկ տները, տոնական տրամադրությունը, որը թևածում է օդում, փոխանցվել է նաև մեզ։ Դժբախտաբար մենք եկել ենք միայն երեք օրով», – Sputnik Արմենիայի թղթակցի հետ զրույցում ասաց Օլգան։
Պարզվեց, որ բուրավետ սուրճ եփելու համար ջազվեն պիտի ծանր լինի` չուգունից։ Դա թույլ է տալիս, որ խմիչքն ավելի երկար մնա տաք. որքան ավելի շատ ժամանակ է զբաղեցնում եփելու պրոցեսը, այնքան ավելի ուժեղ է բացահայտվում սուրճի համը և բույրը։
Սուրճի տաղավարներին հաջորդում են թեյի տաղավարները։ Պարզվում է, որ Հայաստան են ներմուծում, ինչպես նաև տեղում արտադրում են լեռնային խոտաբույսերից թեյի տասնյակ տեսակներ ու փնջեր։
Ինչպես նշեց Sputnik Արմենիայի թղթակցի հետ զրույցում գործարարներից մեկը, այս հարցում հայերը պահպանողական են։
Նա ասաց, որ Հայաստանում նախընտրություն են տալիս դասական սև թեյին, ուրցով, նանայով թեյերին, իսկ էկզոտիկ թեյերից ամենից հաճախ գնում են կարկադեն։
Կազմակերպիչները նշում են, որ այս փառատոնն առաջինը և վերջինը չէ, իսկ հաջորդ տարի նախատեսվում է ավելի լայնածավալ ծրագիր։
«Մեր բախտը բերեց եղանակի հետ, ներկայացված են հետաքրքիր տաղավարներ, ապրանքանիշներ, յուրաքանչյուր մասնակիցը յուրահատուկ է։ Սուրճի թեման միշտ առեղծվածային է և հետաքրքիր, միշտ ինչ–որ նոր բան ես բացահայտում», – Sputnik Արմենիայի թղթակցի հետ զրույցում ասաց փառատոնի կազմակերպիչ Հայկ Հարությունյանը։
Նա նշեց, որ մասնակիցներին և հյուրերին սպասվում է ավելի հետաքրքիր ծրագիր. վաղը կկազմակերպվեն հետաքրքիր թեմատիկ վարպետության դասեր, և ամենագլխավորը` 40–լիտրանոց ջազվեից սուրճ կհյուրասիրեն այցելուներին։