ԵՐԵՎԱՆ, 12 հոկտեմբերի — Sputnik. Շառլ Ազնավուրը սիրում էր մարդկանց ու ամբողջ աշխարհում մեկ հանդիպում էր տարբեր ազգությունների ներկայացուցիչների։ Այսպես սկսեց հանդիսատեսի հետ իր զրույցը Սերժ Լաման՝ ֆրանսիական բեմի հին երգիչներից մեկը, 70-ականների աստղը։
Նա Երևան էր ժամանել Ֆրանկոֆոնիայի շրջանակում մեծն շանսոնյեի հիշատակին նվիրված համերգին մասնակցելու։ Այստեղ` Հանրապետության հրապարակում, սպասում էին մեծն Ազնավուրին՝ ամենացանկալի հյուրին։ Հիմա համերգը նվիրված է ֆրանկոֆոն տարածքի միասնականությանն ու աշխարհում ֆրանսերենի ամենախոշոր դեսպաններից մեկի հիշատակին։
Համերգին ելույթ ունեցավ ֆրանսիացի հայտնի երգչուհի Zaz-ը (Իզաբել Ժեֆրուա), սակայն համերգի վերջում ելույթ ունենալու իրավունքը նա զիջել էր ավագ գործընկերոջը՝ Սերժ Լամային։
Լաման շատ երիտասարդ տեսք ունի (հատկապես, որ Ազնավուրի համեմատ 75-ը պատանեկան տարիք է)։ Նա սկսել է երգել դեռ 60-ականներին, իսկ 70-ականներին բազմիցս ելույթ է ունեցել լեգենդար արտիստի հետ։ Լաման նրան ավագ ուսուցիչ է անվանում։
«Երբ նա հեռացավ, ես մի ժամ արտասվում էի, լացում էի երեխայի պես։ Իսկ ես այդքան էլ հաճախ չեմ լալիս․․․ Գիտեք, նա ինձ ամեն ինչ սովորեցնում էր։ Սովորեցնում էր երգել, ինչ-որ բանի հասնել․․․ Նույնիսկ սովորեցնում էր՝ ինչպես սխալվել», - ասաց է Լաման։
Նա պատմեց, որ Շառլը սիրում էր մարդկանց, սիրում էր հանդիպել նրանց ամբողջ աշխարհում։ Նա երգում էր ԱՄՆ-ում, Հայաստանում, Ռուսաստանում, Անգլիայում, արևադարձային երկրներում, նույնիսկ Ճապոնիայում։ Նա հիշեց, որ Ազնավուրը մահացավ Ճապոնիայից վերադառնալուց մի քանի օր անց։ 94 տարեկան մարդու համար երկու ուղղությամբ քսան ժամ թռիչքն այդքան էլ հեշտ բան չէ։ Դա ավելի քան դժվար է։
«Նրա նախնիները ծնվել են ձեր երկրի այն անկյունում, որտեղ շատ երկար են ապրում»։Նա ուզում էր մինչև հարյուր տարեկան ապրել, ու հնարավոր է, որ մինչ այդ տարիքը երգեր։ Նա ուզում էր երգել ձեզ մոտ` իր սրտի երկրում, ու Փարիզում, քանի որ Ֆրանսիան մի լեզվի երկիր է, որին նա միշտ հավատարիմ էր։ Եվ իհարկե, նա ուզում էր երգել ամբողջ աշխարհում, որտեղ նա իր հետքն է թողել։ Շառլ Ազնավուրը սիրում էր մարդկանց։ Ես էլ եմ սիրում ձեզ», - ավարտեց իր խոսքը Սերժ Լաման։
Վերջում նա երգեց Ազնավուրի La Jeunesse երգը` հեռացող երիտասարդության մասին։
Նշենք՝ երեկ Հանրապետության հրապարակում տեղի ունեցավ Ֆրանկոֆոնիայի 17-րդ գագաթնաժողովին նվիրված գալլա-համերգը։ Համերգի հյուրերն էին ՀՀ վարչապետ Նիկոլ Փաշինյանը` կնոջ՝ Աննա Հակոբյանի հետ, ՀՀ նախագահ Արմեն Սարգսյանը` կնոջ՝ Նունե Սարգսյանի հետ, Ֆրանսիայի նախագահ Էմանուել Մակրոնը` կնոջ՝ Բրիջիտ Մակրոնի հետ, Կանադայի ու Բելգիայի վարչապետներ Ջասթին Տրյուդոն ու Շառլ Միշելը և այլ հյուրեր։
Համերգային ծրագիրը Ֆրանկոֆոնիայի ոգով էր կազմված, այն բազմամշակույթ էր, համապատասխանում էր գագաթաժողովի կարգախոսին՝ «Ապրել միասին»։