ԵՐԵՎԱՆ, 8 հոկտեմբերի — Sputnik. ՀՀ վարչապետ Նիկոլ Փաշինյանը այսօր ՀՀ տրանսպորտի, կապի և տեղեկատվական տեխնոլոգիաների նախարարության աշխատակազմին ներկայացրեց նորանշանակ նախարար Հակոբ Արշակյանին:
«Տեղի է ունեցել նախարարի փոփոխություն, այդ որոշման հանգամանքները ներկայացվել են հրապարակային: Նախ ուզում եմ շնորհակալություն հայտնել Աշոտ Հակոբյանին համատեղ աշխատանքի համար, մաղթել նրան հաջողություններ: Միևնույն ժամանակ ուզում եմ շնորհավորել նոր նախարարին՝ պարոն Արշակյանին, ով մինչ այս առաջին տեղակալն էր: Նա կառավարությունում համարվում էր և հիմա էլ պետք է համարվի, որ Հայաստանը տեխնոլոգիական երկիր դարձնելու քաղաքականության իրականացման թիվ 1 պատասխանատուն է»,- ասաց Նիկոլ Փաշինյանը:
Վարչապետը նշեց, որ հետագայում պետք է մտածել այդ պատասխանատվությունն առավել արդյունավետ դարձնելու կառուցվածքային մեխանիզմների լրամշակման վերաբերյալ:
«Խնդիր ունենք Հայաստանն ագրարային-հանքարդյունաբերական-խաղադրույքների երկրից դարձնել բարձր տեխնոլոգիական արդյունաբերական երկիր: Այս հարցում նախարարության դերը ավելի է ընդգծում: Իհարկե, կարևոր է նաև տրանսպորտը, որը նույնպես պետք է բարձր մակարդակի վրա լինի: Թյուրըմբռնում չլինելու համար ասեմ, որ եթե մենք ասում ենք գյուղատնտեսությունում ներդրվեն տեխնոլոգիական լուծումներ, դա չի նշանակում, որ մեր գյուղմթերքի պետք է լինի ոչ մաքուր: Ընդհակառակը, պետք է կիրառենք այնպես, որ բնապահպանական առումով գյուղմթերքը լինի ավելի մաքուր: Հայաստանը մաքուր սննդի երկիր պետք է լինի»,- ավելացրեց վարչապետը:
Ներկայացնելով ԱԻՆ նոր ղեկավար Ֆելիքս Ցոլակյանին` Նիկոլ Փաշինյանը նշեց, որ Ցոլակյանը կառավարման համակարգում նոր մարդ չէ։
«Չնայած պարոն Ցոլակյանը հեղափոխական ակտիվիստ չի եղել, նրա նշանակումը նախարարի պաշտոնում շատ դրական արձագանք է ստացել: Սա նշանակում է, որ հանրությունն էլ է հասկացել, որ կա գծեր գծելու ժամանակը և կա դրանք ջնջելու ժամանակը: Հիմա եկել է մի շրջան, որ պետք է ավարտենք գծեր գծելու ժամանակը ու սկսենք դրանք ջնջելու ժամանակը»,-հայտարարեց Փաշինյանը:
Նա վստահություն հայտնեց, որ համատեղ աշխատանքը Ֆելիքս Ցոլակյանի հետ կշարունակվի: