ԵՐԵՎԱՆ, 7 Հոկտեմբեր — Sputnik. Ատրճանակը, որը հայտնաբերվել է սպանված Հարություն Ղարագյոզյանի ձեռքին, եղել է «Պիետրո-Բերետտա» տեսակի: Այս մասին ֆեյսբուքի իր էջի միջոցով տեղեկացնում է Ոստիկանության հասարակայնության հետ կապերի և լրատվության վարչության լրատվամիջոցների հետ կապերի բաժնի ղեկավար Էդգար Ջանոյանը:
Ըստ նրա՝ Ղարագյոզյանին ատրճանակը, որպես պարգևատրում ՀՀ վարչապետի կողմից, տրվել էր 2001 թվականի մարտի 22-ին։
Հիշեցնենք, որ հոկտեմբերի 6-ին, ժամը 22-ն անց 40-ի սահմաններում, ոստիկանության Կենտրոնական բաժին ահազանգ է ստացվել, որ Նորք Մարաշի Արմենակյան փողոցում գտնվող հացատներից մեկում կրակոցներ են հնչել։
Րոպեներ անց ոստիկանության Կենտրոնական բաժին ահազանգեր են հնչել նաև Երևանի տարբեր բժշկական կենտրոններից։ Հայտնում էին, որ իրենց մոտ բուժօգնության են տեղափոխվել հրազենային վիրավորումով երկու տղամարդ։ Հոսպիտալացված տղամարդկանցից մեկը` Կարո Կարապետյանը, մահացել է։ Դեպքի վայրում հայտնաբերվել են պարկուճներ և ատրճանակ։ Ձեռնարկված օպերատիվ-հետախուզական միջոցառումների և քննչական գործողությունների արդյունքում պարզվել է հանցագործությունը կատարելու մեջ կասկածվող անձի ինքնությունը։