ԵՐԵՎԱՆ, 3 հոկտեմբերի — Sputnik. Հայտնի շանսոնյե Շառլ Ազնավուրը միշտ հատուկ ջերմությամբ է խոսել հայ–ռուսական բարեկամության մասին։ Այդ մասին ասել է Ռուսաստանում Հայաստանի արտակարգ և լիազոր դեսպան Վարդան Տողանյանը։
Ռուսաստանում հայկական դիվանագիտական առաքելության ղեկավարը ելույթ է ունեցել Հայաստանի դեսպանատանը Շառլ Ազնավուրի մահվան կապակցությամբ սգո մատյանի բացման ժամանակ։
«Ինձ բախտ է վիճակվել ծանոթանալ մեծ մաեստրոյի հետ շատ տարիներ առաջ։ Վերջին տասը տարիներին մենք բազմիցս հանդիպել ենք Փարիզում, Ժնևում և Մոսկվայում։ Ազնավուրի հետ զրույցներն աստվածային էին և կհիշվեն ամբողջ կյանքիս ընթացքում։ Նա տարբեր էր, բայց միաժամանակ միշտ մեծ էր մնում։ Նա միշտ հատուկ ջերմությամբ էր խոսում հայ–ռուսական բարեկամության մասին», – նշեց դեսպանը։
Տողանյանի խոսքով` նա միշտ կհիշի շանսոնյեին որպես կենսուրախ և լավատեսությամբ լի մարդու։ Ազնավուրը հպարտանում էր իր հայկական ծագումով և երազում էր համախմբված և ուժեղ տեսնել հայերին։
«Մենք ամեն ինչ կանենք, որպեսզի Շառլ Ազնավուրի մասին հիշատակը հավերժ ապրի Հայաստանում, Ֆրանսիայում, Ռուսաստանում և ամբողջ աշխարհում», – ասել է Տողանյանը։
Մեծ շանսոնյեին կհուղարկավորեն հոկտեմբերի 5–ին։ Ֆրանսիայի խորհրդարանի պատգամավորները պնդել են, որ պահպանվի ազգային արարողակարգը։ Փարիզում Ազնավուրի հուղարկավորությանը ներկա կլինեն Հայաստանի վարչապետ Նիկոլ Փաշինյանը և նախագահ Արմեն Սարգսյանը։