ԵՐԵՎԱՆ, 2 հոկտեմբերի — Sputnik. ՀՀ վարչապետ Նիկոլ Փաշինյանը Լևոն Սարգսյանին հատուկ հանձնարարություններով դեսպանի պաշտոնից ազատելու որոշում է ստորագրել: Այս մասին տեղեկացնում է ՀՀ կառավարության մամուլի ծառայությունը:
«Ղեկավարվելով «Դիվանագիտական ծառայության մասին» Հայաստանի Հանրապետության օրենքի 16-րդ հոդվածի 1-ին մասով` Լևոն Սարգսյանին ազատել հատուկ հանձնարարություններով դեսպանի պաշտոնից»,- նշված է որոշման տեքստում:
Փաշինյանը որոշումը ստորագրել է երեկ` հոկտեմբերի 1-ին։
Նշենք, որ Լևոն Սարգսյանն այլևս չի զբաղեցնում Երևանի պետական համալսարանի (ԵՊՀ) աստվածաբանության ֆակուլտետի հայ եկեղեցու և եկեղեցաբանության ամբիոնի վարիչի պաշտոնը։ Նա նաև ղեկավարում էր Մեսրոպ Մաշտոցի անվան հին ձեռագրերի «Մատենադարան» գիտահետազոտական ինստիտուտի հոգաբարձուների խորհուրդը: Մատենադարանի տնօրեն Վահան Տեր-Ղևոնդյանն ավելի վաղ հայտնել էր, որ Սարգսյանն այլևս կապ չունի այդ հաստատության հետ:
Լևոն Սարգսյանի նկատմամբ հայտարարված է հետախուզում: Առկա է Երևանի ընդհանուր իրավասության առաջին ատյանի դատարանի որոշումը՝ նրան կալանավորելու վերաբերյալ: Նա մեղադրվում է ապօրինի հարստացման և հայտարարագրման ենթակա գույքը թաքցնելու համար: