ԵՐԵՎԱՆ, 2 հոկտեմբերի – Sputnik. «Լուսավոր Հայաստանն» աջակցում է ՀՀ վարչապետ Նիկոլ Փաշինյանի` գործող խորհրդարանը ցրելու և ԱԺ արտահերթ ընտրություններ կազմակերպելու նախաձեռնությանը: Այս մասին այսօր ԱԺ-ում լրագրողների հետ զրույցում ասաց կուսակցության նախագահ, պատգամավոր Էդմոն Մարուքյանը:
Պատգամավորը դժվարացավ արտահերթ ընտրությունների հստակ ժամկետ նշել, բայց ասաց, որ երբ էլ դրանք լինեն, իրենք պատրաստ են:
«Դրա համար վարչապետը բանակցություններ կանցկացնի քաղաքական ուժերի հետ, որի արդյունքում կգան կոնսենսուսի: Քաղաքական կայունության խնդիր կա, որը կարող է լինել ընտրություններից հետո, որպեսզի իշխող ուժը քաղաքական հենարան ունենա խորհրդարանում»,- ասաց նա:
Մարուքյանը նաև հայտնեց, որ խորհրդարանական ընտրություններին մասնակցելու են նույն` «Լույս» դաշինքով, բայց պատրաստեն ընդլայնել այն:
Հիշեցնենք` ՀՀ վարչապետ Նիկոլ Փաշինյանն ավելի վաղ հայտնել էր, որ պետք է արագացնել ԱԺ արտահերթ ընտրությունների անցկացումը։
ՀՀԿ փոխնախագահ, ԱԺ պատգամավոր Գալուստ Սահակյանն էլ սեպտեմբերի 27-ին կուսակցության գործադիր մարմնի նիստից հետո լրագրողներին ասել էր, որ ՀՀԿ-ն պատրաստ է մասնակցել արտահերթ խորհրդարանական ընտրություններին, եթե դրանք կայանան։
Երեկ` հոկտեմբերի 1-ին, Փաշինյանըհանդիպել էր Ազգային ժողովի «Հանրապետական» խմբակցության ղեկավար Վահրամ Բաղդասարյանի հետ, որը հանդիպումից ասել էր` կարողացել են ձեռք բերել նորմալ պայմանավորվածություններ: