ԵՐԵՎԱՆ, 1 հոկտեմբերի — Sputnik. Հոր սպանության մեջ մեղադրվող Խաչատուրյան քույրերից ավագն ու միջնեկը` Քրիստինան և Անգելինան, մեկուսարանից դուրս գալուց հետո գերադասում են տանը մնալ։ Նորությունների դաշնային գործակալության փոխանցմամբ` այս մասին պատմել են աղջիկների փաստաբանները` Ալեքսեյ Պարշինն ու Ալեքսեյ Լիպցերը։
Նրանց խոսքով` աղջիկները ապագայի ծրագրեր չեն կազմում, առայժմ պարզապես հանգստանում են տանը և չեն ձգտում օգտագործել զբոսանքի դուրս գալու թույլտվությունը։
Սակայն նրանց կրտսեր քույրը` Մարիան, քիչ-քիչ ընտելանում է և մոր ուղեկցությամբ արդեն դուրս է գալիս տնից։ Նրա փաստաբան Յարոսլավ Պակուլինը պատմել է, որ ներկա պահին ընտանիքը լուծում է նրան` մոր տանը մոտ գտնվող մեկ այլ ուսումնական հաստատություն տեղափոխելու հարցը։
Փաստաբանները սպասում են Սերբսկու անվան ինստիտուտի մասնագետների փորձաքննության արդյունքներին։ Պակուլինն ընդգծել է, որ, բացի այդ, ևս մի շարք միջոցառումներ են անցկացվելու, հետաքննությունը դեռ մի քանի ամիս կտևի։
Հիշեցնենք` աղմկահարույց սպանությունը տեղի է ունեցել հուլիսի 27-ին Մոսկվայի հյուսիս-արևելքում։ Երեք քույրերը հայտնել էին, որ սպանել են իրենց հորը` Միխայիլ Խաչատուրյանին։ Հարցաքննության ժամանակ քույրերը խոստովանել էին իրենց մեղքը և բացատրել, որ «իրենք վատ հարաբերություններ են ունեցել հոր հետ, քանի որ հայրը տարիներ շարունակ բարոյապես տանջել է նրանց»։ Մոսկվայի Օստանկինյան դատարանը օգոստոսի 2-ին կալանավորել էր երեք քույրերին։ Սեպտեմբեր 27-ին Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Նրանք տեղավորվել են առանձին բնակարաններում։ Այժմ մեղադրյալներին արգելվում է գիշերային ժամերին լքել բնակության վայրը և որևէ մեկի հետ շփվել առանց Պատժի կատարման դաշնային ծառայությանը տեղեկացնելու։