ԵՐԵՎԱՆ, 1 հոկտեմբերի — Sputnik. ՀՀ վարչապետն այսօրվանից սկսում է արտահերթ ընտրությունների շուրջ աշխատանքային հանդիպումները խորհրդարանական ուժերի հետ։ Այս մասին իր ֆեյսբուքյան ուղիղ հեռարձակման ժամանակ ասաց վարչապետ Նիկոլ Փաշինյանը
«Վերջին ամիսները ցույց տվեցին, որ խորհրդարանում վստահելի իրավիճակ չունենք,– ասաց Փաշինյանը, – արտահերթ խորհրդարանական ընտրությունների հստակ ժողովրդական պահանջ է ձևավորվել»։
Քաղաքական ուժերի հետ հանդիպումների ընթացքում, Փաշինյանի խոսքով, քննարկվելու է, թե ինչ կարգով պետք է հասնեն «շուտափույթ խորհրդարանական ընտրությունների»։
«Ես հույս ունեմ, որ խորհրդարանական ուժերի հետ մեզ կհաջողվի գալ համաձայնության, և քաղաքացիների աջակցությանը դիմելու անհրաժեշտություն չի լինի»,– ասաց Փաշինյանը։
Այդուհանդերձ, նա չբացառեց, որ նման անհրաժեշտություն կծագի` միաժամանակ հույս հայտնելով, որ քաղաքացիները պատրաստ կլինեն աջակցել այդ քաղաքական գործընթացին։