ԵՐԵՎԱՆ, 30 Սեպտեմբեր — Sputnik, Արմենուհի Մխոյան. Հայրաքաղաքն այսօր տոնական է: Գյումրեցիները նշում են քաղաքի օրը: Ու թեև քաղաքային իշխանությունները քաղաքի օրվա տոնակատարություններին մասնակցելու հրավերք ուղարկել էին նաև ՀՀ նախագահին ու վարչապետին, սակայն տոնը գյումրեցիների հետ կիսելու էր եկել միայն ՀՀ փոխվարչապետ Արարատ Միրզոյանը, և ամենուր հյուրասիրության առաջին պատառը հենց նրան էր սպասում:
Քաղաքի ամենագեղեցիկ՝ Ռուսթավելի փողոցում ամեն ինչ հին Գյումրին էր հիշեցնում՝ առաջին կանգառը Ձիթողցյանց տոհմից հարուստ վաճառական Պետրոս աղայի տանն էր: Առատաձեռն ու հյուրասեր գյումրեցին պարտադիր իր տուն է հրավիրում բոլոր հյուրերին և հյուրասիրում: Փոխվարչապետն ու մարզային և քաղաքային իշխանությունների ներկայացուցիչները ևս առաջինը Պետրոս աղայի տուն մտան:
Սրանով փոխվարչապետի արվող անակնկալները չավարտվեցին. Գյումրի այցելած հյուրն անպայման նաև քյալլա պետք է փորձի: Փոխվարչապետը փորձեց ու Sputnik Արմենիային վստահեցրեց՝ արժե սրանից հետո արդեն նաև քյալլայի համար Գյումրի գալ: «Միշտ ուզել եմ, բայց երբեք չի ստացվել փորձել: Համեղ է»,-անկեղծացավ Միրզոյանը:
Հոգևոր երգերից մինչև հայրենասիրական կատարումներ, ռոքից մինչև դասական՝ քաղաքի բոլոր հատվածներում տարբեր ծրագրերով հանդես էին գալիս քաղաքապետարանի ենթակայության խմբերն ու անհատ կատարողները: Տիկնիկային ու պարային ֆլեշ մոբ, համատեղ կտավի ստեղծում, հին ու նոր լուսանկարների ցուցահանդես՝ գյումրեցիներն ու քաղաք այցելած հյուրերն ազատ էին իրենց սրտի ուզած և իրենց ճաշակով միջոցառմանը մասնակցելու:
«Գյումրիի հետ կապված իրականում մեկ ցանկություն ու երազանք ունեմ՝ ուզում եմ, որ Գյումրին այլևս երբեք խեղճ չլինի, վերադառնա նրա ամբողջական կենսուրախությունը, աշխուժությունը, հումորը, սրամտությունը՝ չնայած դա երբեք չի էլ պակասել: Գյումրին պետք է կարողանա ամբողջովին շտկել իր մեջքը, իսկ դրա համար կան բազմաթիվ ներդրումային ծրագրեր»,-լրագրողների հետ ունեցած ճեպազրույցի ժամանակ նշեց փոխվարչապետ Միրզոյանը՝ վստահեցնելով, որ կառավարությունը մեծ ուշադրություն է դարձնում Գյումրին և Շիրակի մարզին ընդհանրապես:
Տոնական միջոցառումները կեզրափակվեն երեկոյան տոնական համերգով ու հրավառությամբ:
Շուրջ 30 տարի տնակային թաղամասեր, անօթևանության ու գործազրկության անլուծելի թվացող խնդիրներ ունեցող քաղաքը մեկ օրով մոռացավ իր խնդիրների մասին ու նշեց սիրված քաղաքի տոնը: