ԵՐԵՎԱՆ, 28 սեպտեմբերի — Sputnik. Հայաստանի վարչապետ Նիկոլ Փաշինյանի որոշումն արտահերթ խորհրդարանական ընտրություններ անցկացնելու մասին կհանգեցնի մնացած բոլոր քաղաքական ուժերի միավորմանը, Sputnik Արմենիային ասաց քաղաքագետ Երվանդ Բոզոյանը։
Նրա կարծիքով` Նիկոլ Փաշինյանի նպատակներն ակնհայտ են։ Վարչապետը փորձում է կապիտալիզացնել ձայների այն 81 տոկոսը, որոնք նրա դաշինքը ստացել է Երևանի ընտրություններում։ Հենց դա է Փաշինյանի գլխավոր խնդիրը։
«Նա փորձում է ճնշում գործադրել Ազգային ժողովի վրա, որպեսզի հնարավորինս սեղմ ժամկետում ընտրություններ անցկացնի, երբ նրա վարկանիշը բարձր է», – ասաց Բոզոյանը։
Ինչ վերաբերում է Հայաստանի հանրապետական կուսակցությանը և այլ ուժերի, ապա նրանք մտավախություն ունեն, որ կարող են լքել խորհրդարանն արտահերթ ընտրությունների արդյունքում։
Տրամաբանական է, որ նման հեռանկարը միավորում է բոլոր մնացած քաղաքական ուժերին։
«Ոչ ոք չի ուզում դուրս մնալ քաղաքական դաշտից, հետևաբար, կսկսվի դիմակայություն օրենսդրական մարմնի և Փաշինյանի միջև», – նշեց Բոզոյանը։
Առավել ևս, որ ՄԱԿ–ում ելույթի ժամանակ Փաշինյանը նշեց, որ ինքն ԱԺ-ում ունի ոչ թե 9, այլ 4 ձայն (միայն «Քաղաքացիական պայմանագրի» անդամներինը, որը մտնում է «Ելքի» դաշինքի մեջ)։ Դրանով հանդերձ վարչապետը ցույց տվեց, որ «Լույս» դաշինքը («Լուսավոր Հայաստանն» ու «Հանրապետությունը») իր թիմից չէ։
Փաստորեն վարչապետը ձգտում է «վերցնել» ամբողջ խորհրդարանը։
««Լույս» դաշինքը հիանալի հասկանում է, որ եթե ընտրությունները տեղի ունենան դեկտեմբերին կամ մինչ այդ, ապա դժվար է ասել` նրանք կմտնե՞ն խորհրդարան։ Եթե ընտրությունները տեղի ունենան մայիս–հունիսին, ապա այդ հավանականությունն ավելի մեծ կլինի», – նշեց Բոզոյանը։
Այսպիսով, արտահերթ ընտրությունների անցկացումը ձեռնտու է միայն Նիկոլ Փաշինյանին։ Մնացած բոլոր կուսակցություններին, ինչպես նաև այն ուժերին, որոնք նախատեսում են նոր կուսակցություններ բացել, դա ձեռնտու չէ։
Ամենայն հավանականությամբ, բոլոր մնացած քաղաքական ուժերի միջև արդեն ընթանում են կուլուարային բանակցություններ։ Սակայն բարդ է ասել, թե ինչպես կավարտվի այդ «պայքարը»։ Բոզոյանը չի բացառում, որ փոխզիջման արդյունքում ընտրությունները տեղի կունենան մայիսին։
«Արտահերթ ընտրություններն անհրաժեշտ են, բայց դեկտեմբերին դրանց անցկացումը կհանգեցնի մի բռնապետական համակարգից մյուսին անցնելուն», – ասաց Բոզոյանը։
Նրա խոսքով` այդ տեսակետը կիսում են նաև որոշ ուժեր, որոնք լիովին աջակցել են Փաշինյանին։
Հիշեցնենք` Նյու Յորքում, ՄԱԿ-ի կենտրոնակայանում, Գլխավոր ասամբլեայի 73-րդ նստաշրջանին արտասանած ելույթում վարչապետ Նիկոլ Փաշինյանն անդրադարձել է նաև Հայաստանում տեղի ունեցած թավշյա հեղափոխությանն ու ներքաղաքական ներկա վիճակին:
Փաշինյանը հայտարարեց, որ Երևանի ավագանու ընտրությունների ոգով Հայաստանն այսօր պատրաստվում է արտահերթ խորհրդարանական ընտրություններին: