ԵՐԵՎԱՆ, 28 սեպտեմբերի — Sputnik. Հայաստանի վարչապետ Նիկոլ Փաշինյանը ԱՊՀ անդամ երկրների առաջնորդների հետ Տաջիկստանի գյուղմթերքի և ազգային ուտեստների ցուցահանդեսին միրգ ու բանջարեղեն է համտեսել։ Ցուցահանդեսը կազմակերպվել էր Դուշանբեի կառավարական նստավայրի տարածքում։ Այս մասին հայտնում է Տաջիկստանի նախագահի մամուլի ծառայությունը։
Բարեկամության երեկոն հատուկ կազմակերպվել էր ԱՊՀ անդամ երկրների ղեկավարների խորհրդի նիստի մասնակիցների համար։ Երեկոյին, բացի ՀՀ վարչապետից, մասնակցեցին Բելառուսի նախագահ Ալեքսանդր Լուկաշենկոն, Ղազախստանի նախագահ Նուրսուլթան Նազարբաևը, Ղրղըզստանի նախագահ Սոորոնբայ Ժեենբեկովը, Մոլդովայի նախագահ Իգոր Դոդոնը, Ադրբեջանի նախագահ Իլհամ Ալիևը, Ռուսաստանի նախագահ Վլադիմիր Պուտինը և Ուզբեկստանի նախագահ Շավկաթ Միրզիեևը։
«Վառ գույներով ու բազմազանությամբ տարբերվող ցուցահանդեսին ներկայացվել են միրգ ու բանջարեղեն, չրեր և մեղր, ինչպես նաև տաջիկական բարեբեր հողի անզուգական այլ բարիքներ, որոնք հարգարժան հյուրերը հավանել են», – գրված է հաղորդագրության մեջ։
Նշվում է նաև, որ տաջիկական կողմը պատրաստ է համագործակցել ԱՊՀ և մյուս պետությունների բոլոր շահագրգիռ անդամ երկրների հետ` նպատակ ունենալով նրանց բարձրակարգ գյուղատնտեսական արտադրանք մատակարարել։
Հիշեցնենք, որ ՀՀ վարչապետը երկօրյա աշխատանքային այցով Տաջիկստան էր մեկնել Նյու Յորքից։ Դուշանբեում նա մասնակցում է ԱՊՀ ղեկավարների խորհրդի նիստին։