ԵՐԵՎԱՆ, 28 սեպտեմբերի — Sputnik. Այսօր՝ սեպտեմբերի 28-ին, Քննչական կոմիտեում տեղի է ունեցել քննիչների թեկնածությունների ցուցակում ընդգրկված՝ Արդարադատության ակադեմիայի 21 շրջանավարտների դիպլոմների հանձնման հանդիսավոր արարողությունը:
Ինչպես տեղեկացնում են կոմիտեից՝ միջոցառմանը ներկա են եղել ՀՀ ՔԿ նախագահ Հայկ Գրիգորյանը, Արդարադատության ակադեմիայի ռեկտոր Սերգեյ Առաքելյանը, կոմիտեի կոլեգիայի անդամներ։
Քննիչները երդվել են հավատարմորեն ծառայել Հայաստանի Հանրապետության ժողովրդին, խստագույնս պահպանել Հանրապետության Սահմանադրությունը և օրենքները, հանցավոր ոտնձգություններից պաշտպանել մարդու և քաղաքացու իրավունքներն ու ազատությունները, հասարակական կարգն ու անվտանգությունը, անվերապահորեն և բարեխղճորեն կատարել իրենց պարտականությունները:
Դիպլոմների հետ միասին քննիչների թեկնածուներն ստացել են նաև ՀՀ ՔԿ տարածքային ստորաբաժանումներում աշխատանքի ընդունվելու մասին ՀՀ ՔԿ նախագահի հրամանները:
Շնորհավորելով շրջանավարտներին՝ ՀՀ քննչական կոմիտեի նախագահ Հայկ Գրիգորյանը նորանշանակ քննիչներին հորդորել է առաջնորդվել սպայի հոգեբանությամբ, հատուկ շեշտելով, որ սպան ոչ թե կոչում է, այլ՝ կենսակերպ ու առաքելություն:
«Մենք ենք ապօրինություններից տուժած քաղաքացիների պաշտպանն ու խախտված իրավունքները վերականգնողը: Յուրաքանչյուր քաղաքացի, ի դեմս ձեզ, տեսնում է պետություն, ձեզ հետ աշխատելով կարծիք է կազմում պետության մասին: Հետևաբար՝ աշխատանքի առաջին իսկ օրվանից քաղաքացու հանդեպ դրսևորեք սրտացավություն և հարգանք»,- նշել է ՔԿ նախագահը՝ ընդգծելով, որ Քննչական կոմիտեում ծառայության անցած յուրաքանչյուր քննիչի գործունեություն պետք է միտված լինի օրենքին ծառայելը:
Շնորհավորական խոսքով հանդես է եկել նաև ՀՀ արդարադատության ակադեմիայի ռեկտոր Սերգեյ Առաքելյանը և համոզմունք հայտնել, որ ակադեմիայի շրջանավարտները պատրաստ են պատվով իրականացնել իրենց առաքելությունը:
Արդարադատության ակադեմիայում 2018թ. քննիչների թեկնածությունների ցուցակում ընդգրկված անձանց մասնագիտական պատրաստումն իրականացվել է երկու խմբով: Առաջին խմբում ընդգրկված թեկնածուներից 21-ն այսօր ստացան իրենց դիպլոմները։
Ուսումնառության շարունակում է ևս 31 թեկնածու, որոնք ծրագիրը կավարտեն սույն թվականի նոյեմբերին և դրական գնահատականներ ստանալու դեպքում աշխատանքի կանցնեն ՀՀ քննչական կոմիտեում։